^{عەلیڕەزا سپاهی لاین، ڕۆژنامەنووس و شاعێری کوردی خەڵکی خوراسان بە تۆمەتی "بێڕێزیی بە بەرپرسان و مەئموورانـ"ـی حکوومەتی لە لقی یەکی دادگای کەیفەریی ٢ی شاری کەلاتی نادری بە لێدانی ٧٤ قامچی مەحکووم کرا.}

^{سەرچاوەیەکی ئاگادار باسی لە گوشارە بەردەوامەکانی دەزگای قەزاییی حکوومەتی ئێران بۆ سەر ئەو شاعێرە کوردە کرد و بە هۆی گوشاری ناوەندە ئیتلاعاتییەکان، ئەم سەرچاوەیە لە دانی زانیاری ورد لە بارەی بارودۆخی ئەو شاعێرە کوردە خۆی بوارد.}

^{ئەو شاعێر و ڕۆژنامەنووسە کوردە، مانگی سەرماوەزی ساڵی ٩٦ بە هۆی بڵاوکردنەوەی بابەتێک لەژێر ناوی "جهل، تواناتر از سیل" لە لایەن دادسەرای گشتی و ئینقلابی شاری کەلات بانگهێشت و بە تۆمەتی "بڵاوکردنەوەی درۆ و تێکدانی بیروڕای گشتی" تاوانبار کرا. ئەو نووسەرە کوردە بە هۆی ئەوەی کە دوو ڕۆژ دواتر سەردانی دادگای کردبوو، لە لایەن دادوەر "نەزەری"، جێگیری دۆزگەرەوە دەسبەسەر و ڕەوانەی زیندانی وەکێڵئاوا کرا و دواتر بە دانانی بارمتە ئازاد کرا.}

^{هەروەها ئەو شاعێرە کوردە، سەبارەت بەو حوکمە، لە زیندانی وەکێڵئاوا مانی گرتووە.}

^{پێشتریش، ئەم شاعێرە کوردە، ڕۆژی ٨ی گەلاوێژی ساڵی ٩٠ لە لایەن هێزە ئیتلاعاتییەکانی شاری مەشهەدەوە بە تۆمەتی "پەیوەندیی لەگەڵ حیزبە کوردییەکان ئۆپۆزسیونی حکوومەتی ئێران"، هۆنینەوە دروشمی ڕەخنەگەرانە دژی حکوومەت و ڕیزگرتن لە ڕێبەرانی کورد" دەسبەسەر کرابوو. هەروەها مانگی بەفرانباری ساڵی ٩٢ لقی ٣ی دادگای شاری مەشهەد بە سەرۆکایەتی دادوەر سوڵتانی، عەلیڕەزا سپاهی لاینی بە ١١ مانگ زیندان، ٥ مانگ بێبەش بوون لە چالاکیی فەرهەنگی و دانی پارە نەخت مەحکووم کردبوو.}

^{عەلیڕەزا سپاهی لاین هەتا ئێستا زیاتر لە ١٠ کتێبی بە زمانەکانی کوردی و فارسی بڵاوکردووتەوە و بە یەکێک لە نووسەرە بە تواناکانی ئێرانی بە ئەژمار دێت.}

18/5/2018