^{پارێزەری کچانی شیناوێی شاری پیرانشار، دەوڵەتی ئێرانی بە بەرپرسی ئازار و مەینەتییەکانی کچانی شیناوێ زانی.}

^{حوسێن ئەحمەدی‌نیاز، پارێزەری کچانی شیناوێی پیرانشار ڕایگەیاندووە: ماوەی ٦ ساڵە لە ئێش و ئازارەکانی ئەو کچانە تێدەپەڕێ، دەبێ دەوڵەت قەرەبووی ئەو هەموو ئازارە بکاتەوە.}

^{ناوبراو هەروەها دەڵێت: "لە ماوەی ئەو ٦ ساڵەدا، هەتا ئێستا زیاتر لە ٣٦٠ نەشتەرگەری بۆ ئەو کچانە کراوە، دەبێت دەوڵەت قەرەبووی ئەو زیانلێکەوتووانە بکاتەوە.}

^{ئەحمەدی‌نیاز هەروەها دەڵێت: من بەدواداچوون بۆ دۆسیەی کچانی شیناوێ دەکەم و دووبارە لە سەر دەوڵەت سکاڵا تۆمار دەکەم لە هەمبەر کەمتەرخەمی و قەرەبوونەکردنەوەی زیانەکانیان.}

^{ڕۆژی ١٥ی سەرماوەزی 1391ی هەتاوی، ٣٧ قوتابی کچ بە هۆی ئاگرگرتنی یەکێک لە پۆلەکانی خوێندن لە قوتابخانەی شیناوێ تووشی سووتانی لەڕادەبەدەر بوون و دوو قوتابیش بە ناوەکانی "سەیران یەگانە و "سارینا ڕەسووڵزادە" بەو هۆیەوە گیانیان لە دەست دا.}

^{ئەو پارێزەرە کوردە مانگی ڕەشەمەی ساڵی ڕابردوو، داوای گواستنەوەی کچانی شیناوێ بۆ چارەسەری پزیشکی لە دەرەوەی وڵات و دانی دیە بۆ ئەو کچانەی کردبوو.}

^{ناوبراو هەروەها ڕایگەیاندووە: "لە ئەگەری جێبەجێ نەکردنی داواکارییە یاساییەکانی ئێمە، ناچارین لە تاران دەست بە مانگرتن بکەین."}

28/4/2018