^{وەزیرانی دەرەوەی هەرسێ وڵاتی رووسیا، تورکیا و ئێران لە مۆسکۆی پایتەختی رووسیا، کۆ دەبنەوە.}

^{کۆبوونەوەکە دوای نیوەڕۆی رۆژی شەممە 28/4/2018 لە مۆسکۆی بە ئامادەبوونی سێرگی لاڤرۆڤ، محەمەدجەواد زەریف و مەولود چاوشئۆغڵوی وەزیرانی دەرەوەی رووسیا، ئێران و تورکیا بەڕێوە چوو.}

^{بەپێی زانیارییە بڵاو کراوەکان، لاڤرۆڤ، زەریف و چاویشئۆغڵو تاوتوێی بارودۆخی رۆژهەڵاتی ناوەڕاست بە گشتی و سووریا و رۆژئاوای کوردستان بە تایبەتی دەکەن.}

^{ئەو کۆبوونەوەیە دوای کۆبوونەوەی لوتکەی ئەو سێ وڵاتە دێت، کە تایبەت بوو بە روشی سووریا.}

^{رۆژی چوارشەممە 4/4/2018، هەرسێ سەرۆک ڤلادیمێر پوتین، حەسەن رۆحانی و رەجەب تەییب ئەردۆغانی سەرۆک کۆمارانی رووسیا، ئێران و تورکیا، کۆبوونەوەی لوتکەی وڵاتەکانیان، لە ئەنقەرە ئەنجام دا..}

^{لە کۆبوونەوەکەدا، پوتین، ئەردۆغان و رۆحانی باسی داهاتووی سووریا و رێگاکانی کۆتایی هێنان بە شەڕی ناوخۆیی ئەو وڵاتە بە رۆژئاوای کوردستانیشەوە، کرد.}

^{لە سەرەتای شەڕی ناوخۆیی سووریاوە، تورکیا پشتگیریی خۆی بۆ بەشێک لە ئۆپۆزیسیۆن راگەیاندووە و داوای لەسەرکار لاچوونی بەشار ئەسەدی سەرۆکی رژێمی سووریا دەکات و هەردوو وڵاتی ئێران و رووسیاش بە ناردنی چەک و چەکدار، پشتگیریی رژێمی سووریا دەکەن.}

^{لە مانگی ئاداری 2011ـەوە شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.}

^{بەهۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن هاووڵاتیی لە ناوخۆی وڵاتەکە، بۆ وڵاتانی دەوروبەر و جیهان ئاوارە بوون و زیاتر لە نیو ملیۆن کەسیش گیانیان لەدەست داوە.}

28/4/2018