هێزەکانی ئیتلاعات و ئیدارەی ئەماکن، هەڕەشەیان لە بازاڕیانی مانگرتووی کوردستان کردووە.

بەپێی هەواڵی  هەواڵدەریی کوردپا، هێزە ئیتلاعاتییەکان لە شارەکانی مەریوان، بانە و جوانڕۆ هەڕەشەیان لە بازاڕیانی مانگرتوو کردووە کە کۆتایی بە مانگرتنەکەیان بێنن.

هێزە ئیتلاعاتییەکان بە بازاڕیانیان ڕاگەیاندووە، لە ئەگەری بەردەوامبوونی مانگرتنەکان لەگەڵ سزای قورسی قەزایی و هەڵوەشاندنەوەی مۆڵەتی کار بەرەوڕوو دەبنەوە.

هەواڵە بڵاوکراوەکان باس لەو دەکەن، کە بازاڕیانی شاری بانە لە مانگرتنی سەرتاسەریدان و بەرپرسی شۆرای شاری بانە لە وتوویژێکدا لەگەڵ "اعتماد آنلاین" وێڕای پێداگری لەسەر ئەو هەواڵە وتوویەتی:" دووکانەکانی شاری بانە بەگشتی داخراون".

لە لایەکی دیکەوە، بەپێی ڕاپۆرتی هەواڵنێری کوردپا لە شاری بانە، ژمارەیەک لە بازاڕیانی مانگرتوو لە لایەن هێزە ئیتلاعاتییەکانەوە دەسبەسەر کراون و بۆ شوێنێکی نادیار ڕاگوێزراون.

هەواڵنێری کوردپا، شوناسی دوو کەس لە بازاڕیانی مانگرتووی دەسبەسەرکراو، بە ناوەکانی "موحسێن عەلیزادە" کوڕی عەلی و "ڕزگار ڕەفاهی" ڕاگەیاندووە.

هەتا کاتی بڵاوبوونەوەی ئەم هەواڵە، مانگرتنی سەرتاسەری لە شارەکانی بانە، پیرانشار، جوانڕۆ و مەریوان درێژەی هەیە و هەتا ئێستە بەرپرسان هیچ هەوڵێکی جیددیان بۆ چارەسەرکردنی داواکاریی مانگرتووان نەداوە.

٢٠/٤/٢٠١٨