^{لە سێیەمین رۆژی مانگرتنی خەڵکی شارەکانی بانە و جوانڕۆ، ئەمرۆ سێ‌شەممە ٢٨ی خاکەلێوەی ٩٧ی هەتاوی خەڵکی وەزاڵەهاتوو و کاسبکارانی شارەکانی سەردەشت و سەقز و مەریوانیش پەیوەست بەو مانگرتنە بوون و، لە هەمبەر دۆخی نالەباری ئابووری و داخستنی سنوورە لاوەکییەکان، دووکان و بازاڕیان داخست.}

^{ئەمرۆ سێ‌شەممە بەشێک لە کاسبکاران و دووکاندارانی شاری سەقز بە داخستنی بازاڕی شار، بەرانبەر بە داخرانی سنوورەکان و فشاری ناوندە پێوەندیدارەکان بەسەر چینی کۆڵبەر و کاسبکار ، ناڕەزایەتییان دەربڕی.}

^{بەپێی هەواڵی ماڵپەڕە خۆجێیەکانی کوردستان، کاسبکار و دووکاندارانی شارەکانی جوانڕۆ لە سێیەمین رۆژی مانگرتنیان ، ئەمڕۆ ٢٨ی خاکەلێوە لە بەردەم بینای فەرمانداری ئەو شارە کۆبوونەوە.}

^{هەروەها لە شارەکانی سەردەشت و بانە و سەقز و مەریوانیش خەڵکی ناڕازی گردبوونەوەی ناڕەزایەتییان بەڕێوەبرد و، بە ڕاخستنی سفرەی بەتاڵ لە سەرشەقام ” بە نیشانەی ئاستی هەژاری ودەسکورتی” و، نووسینی دروشمی پێوەندی‌دار ، بەرانبەر بە کەمتەرخەمیی بەرپرسان و داخرانی سنوورەکان وەکوو تاقە ڕێگایەک بۆ دابینکردنی بژێوی ژیان، ناڕەزایەتییان دەربڕی.
هەروەها هەواڵەکان باس لەوە دەکەن لە شاری مەریوان و سەقزیش خەڵکی کەسبکار و زەحمەتکێشی ئەو دوو شارە، دەستیان داوەتە مانگرتن و ڕێپێوانی ناڕەزایەتییان بەڕێوەبردوە.
جێی وەبیرهێنانەوەی لە دەسپێکی ساڵی نوێی هەتاوی، ئەمە دوویەمین جارە کە دووکانداران و کاسبکارانی شارە سنوورییەکانی کوردستان بەرانبەر بە داخستنی سنوورە کۆڵبەر و لاوەکییەکان، مانیان‌ گرتووە.}

١٧/٤/٢٠١٨