^{پێنج رۆژە عەرەبەكانی ئەهواز لە خۆپێشاندان و ناڕەزایی دەربڕینن لە بەرانبەر سیاسەتەكانی رەگەزپەرستی حكوومەتی ئێران، هاوكات لەلایەن حكوومەتی ئەو وڵاتەوە بە گولە سەركوت دەكرێن، بۆیە ئەوان پەنایان بۆ خۆپێشاندانی شەوانە بردووە بۆ كەمكردنەوەی زیانەكانیان.}

^{ناڕەزایەتییەكانی ئێران بەردەوامە و پێش چەند مانگێك تاران و زۆرینەی شار و شارۆكەكانی ئێران و رۆژهەڵاتی كوردستانی گرتەوە كە بەرجەستەی ناڕەزایی ئەوانی لەدژی سیاسەتەكانی حكوومەتی ئێران بەتایبەتی لە رووی ئابووریییەوە دەكرد و حكوومەتی وڵاتەكەیان بەوە تۆمەتبار كرد كە داهاتی ئێران لە دەرەوەی وڵاتەكە لە جەنگ و پاڵپشتیكردنی گرووپە چەكدارەكان خەرج دەكات.}

^{وەك تەكتیكێكی نوێ بە مەبەستی كەمكردنەوەی زیان و گرتنی خۆپێشاندەران، ئەهوازییەكان شەوانە ناڕەزایی رێك دەخەن لەو خۆپێشاندانەی چووەتە ناو پێنجەم رۆژییەوە كە ئەو ناڕەزاییانە بێجگە لە ئەهواز شەش شاری تری ناوچەكەی گرتووەتەوە ئەوانیش عەبادان و مەعشوور و شبیشە و شەیبان و حەمیدییە و ئەحوازی پایەتەختە.}

^{چالاكان لەو بارەوە دەڵێن، كە بەمەبەستی كەمكردنەوەی زیانەكان و گرتنی خەڵكەكە لەلایەن هێزەكانی تەناهییەوە، ئەوان شەوانە ناڕەزایی پێشان دەدەن، لەو كاتەی حكوومەتی ئێران پاڵپشتی تەناهی رەوانەی ئەهواز و شارەكانی خوزستان كردووە بۆ سەركوتكردنی هاووڵاتییانی خوزستان كە بەهۆی سووكایەتیكردنی تەلەڤزیۆنی حكوومەتی ئێران بە هاووڵاتییانی عەرەب ناڕەزایی دەستی پێ كردووە.}

^{لای خۆیەوە حەسەن رازی، بەڕێوەبەری سەنتەری ئەهواز بۆ راگەیاندن و توێژینەوەی ستراتیجی دەڵێت، سوپای پاسداران توندوتیژیان لە بەرانبەر خۆپێشاندەران بەكار هێناوە و بریندار و گرتن هەیە و ئاماژە دەكات كە خۆپێشاندانەكان بەهۆی سیاسەتی رەگەزپەرستانەی رژێمی ئێران و هەوڵەكانی بۆ گۆڕینی دیمۆگرافیەتی ناوچەی ئەهواز دەستی پێ كرد و ئەوان دەماری ئەهوازییەكان دەگرن.}

2/4/2018