^{بەپێی ڕاپۆرتی میدیا فەرمییەکانی ئێران، ، بوومەلەرزەیەکی گەورە بە گوژمی 5:3 بە پلەی ڕیشتەر شاری سەرپێڵ‌زەهاو و چەند شاری دیکەی پارێزگای کرماشانی هەژاندووە.}

^{ماڵپەڕی (تەسنیم) لەمبارەوە بڵاوی کردووەتەوە بوومەلەرزەکە سەعات 1:5 خولەکی و 25 چرکەی ئەمڕۆ یەکشەممە 2018/4/1 بە کاتی ئێران لە قووڵایی 8 کیلۆمەتر لە سەرپێڵ‌زەهاو و بەشێکی زۆر لە شارەکانی پارێزگای کرماشان هەست پێکراوە، بەڵام سەنتەرەکەی لە سەرپێڵ‌زەهاو بووە و لە دەشتی زەهاو و شارەکانی سەلاسی باوەجانی و سەرپێڵ زیاتر بووە.}

^{سەرچاوەکان لە ڕۆژهەڵاتی کوردستان باس لەوە دەکەن کە بوومەلەرزەکە لە شارەکانی پاوە، هەورامان و مەریوانیش هەستی پێکراوە و هاوکات لە پاریزگای هەڵەبجەش ڕووی داوە.}

^{هەرچەند بەشێک لە خانووی هاووڵاتین و هەندێک شاخیش داڕووخاون، بەڵام هەتا ئێستا وردەکاری لەبارەی زیانە گیانییەکانی ئەو بوومەلەرزەیە لە سەرپێڵ‌زەهاو بڵاو نەکراوەتەوە.}

^{هاوکات مانگی سووری شارەکانی قەسرشیرین و سەرپێڵ‌زەهاو داوا لە خەڵک دەکەن کە لە ناوچە بوومەلەرزەلیدراوەکە دوور بکەونەوە.}

^{زیاتر لە چوار مانگ لەمەوبەر بوومەلەرزەیەکی بەهێز هەشت شار و سەدان گوندی پارێزگای کرماشانی هەژاند کە نزیکەی هەزار هاووڵاتیی کورد بوونە قوربانی و زیاتر لە 13 هەزار کەسیش بریندار بوون.}

^{ئەم بوومەلەرزەیە لە کاتێکدا ڕووی داوە کە هێشتا ئاسەوارەکانی بوومەلەرزەی پێشوو چاک نەکراون و زۆربەی خەڵک لەناو خێوەت و لە ژیانێکی زۆر خراپدا دەژین.}

2/4/2018