^{هێزە ئەمنیەتییەکانی حکوومەتی ئێران سێ چالاکی مەدەنییان لە شاری سەڵماس بانگهێشت و لێپرسینەوەیان لەگەڵ کرا.}

^{بەپێی هەواڵی گەیشتوو بە ئاژانسی هەواڵدەریی کوردپا، حەوتووی ڕابردوو ٢٩ی ڕەشەمە، سێ چالاکی مەدەنیی خەڵکی شاری سەڵماس سەر بە پارێزگای ورمێ بە ناوەکانی"مەحموود جەباری"،"ئەمین جەداری" و "حەمدوڵا کارساز" لەلایەن ناوەندە حکوومەتییەکانەوە بانگهێشت کران.}

^{بە وتەی سەرچاوەیەکی ئاگادار، هێزە ئەمنیەتییەکان ئەو سێ چالاکە مەدەنییەیان بە تۆمەتی هەوڵدان بۆ بەڕێوەبردنی ڕێوڕەسمی نەورۆز بانگهێشت و دەستبەسەر کردووە.}

^{بە وتەی ئەو سەرچاوەیە، حەمدوڵا کارساز پاش چەند کاتژمێر لێپرسینەوە هەمان ڕۆژ ئازاد کراوە و ئەو دوو چالاکە مەدەنییەی دیکە بە شێوەی کاتی لە زیندان ئازاد کراون.}

^{پێشتریش، ڕۆژی دووشەممە ٢٨ی ڕەشەمە ئیدارەی ئیتلاعاتی شاری سنە، پێنج چالاکی مەدەنیی خەڵکی ئەو شارەیان بە ناوەکانی "موحسێن مورادی، ئاریوان شاکری، مێهران محەممەدی، عێرفان ساعدپەنا و سالار کازمی" بانگهێشت و لێکۆڵینەوەیان لەگەڵ کردبوو.}

26/3/2018