^{ژمارەیەک لە هەواڵنێرانی سەر بە ناوەندە ئیتلاعاتییەکان لە کوردستان داوای هەڵسوکەوتی قەزایی لەگەڵ ڕۆژنامەوانێکی کوردیان کرد.}

^{بەپێی هەواڵی ئاژانسی هەواڵدەریی کوردپا، ژمارەیەک لە هەواڵنێرانی سەر بە ناوەندە ئیتلاعاتییەکانی کۆماری ئیسلامی لە نامەیەکدا بۆ دۆزگەری گشتی و ئینقلابی شاری سنە، داوایان لە ناوبراو کردووە تا لەگەڵ ئیجلال قەوامی ڕۆژنامەنووس و چالاکی مافی مرۆڤ هەڵسوکەوتی قەزایی بکرێت.}

^{ئەم نامەیە کە لەلایەن ١٠ کەس لە هەواڵنێرانی ماڵپەڕ و حەوتوونامەکانی سەر بە ناوەندە ئیتڵاعاتییەکانەوە واژۆکراوە، ئەم ڕۆژنامە نووسە کوردەیان بە "نوسینی بابەت و وتووێژ کردن لەگەڵ میدیاکانی دژە شۆڕش" تۆمەتبار کردووە.}

^{دەوترێت، لە ماوەی مانگەکانی ڕابردوودا، گوشار و بەربەستی زیاتر بۆ ئیجلال قەوامی دروست کراوە، تا ئەو شوێنەی کە ڕێگری لە بەشداری ناوبراو لە کۆبوونەوە ڕۆژنامەوانییەکاندا کراوە.}

^{ئیجلال قەوامی، چالاکییە ڕۆژنامەوانییەکانی خۆی لە ساڵی ١٣٧٩ی هەتاوییەوە لە ڕۆژنامەی ئێران دەست پێکردووە، لە ئێستادا وەکوو ڕۆژنامەوانێکی ناسراو لە کوردستانی ڕۆژهەڵاتدا بە ئەژمار دێت.}