ڕۆژنامه‌یه‌كی ئیسرائیلی ئاشكراى ده‌كات، هه‌ماهه‌نگی له‌نێوان ته‌ل ئه‌بیب و ڕیاز له‌باره‌ى چۆنێتى مامه‌ڵه‌كردن له‌گه‌ڵ تاران و چه‌ند دۆسێیه‌كی ترى ناوچه‌كه، هه‌یه و، سه‌رقاڵى "ڕێككه‌وتنى سه‌ده"ـن.
ڕۆژنامه‌ى (ئیسرائیلی ئه‌مڕۆ) له‌سه‌ر زارى سه‌رچاوه‌یه‌كی باڵاى میسرییه‌وه، بڵاویكرده‌وه، له‌نێوان سعودیه و ئیسرائیل، به‌نێوه‌ندگیریی میسر له‌ڕێگه‌ى سه‌ردانه‌كه‌ى ئه‌م دواییه‌ى محه‌مه‌د بن سه‌لمان بۆ قاهیره، په‌یام ئاڵوگۆڕ كراوه.
سه‌رچاوه میسرییه‌كه، ڕه‌تیكرده‌وه دیدارى ڕاسته‌وخۆ له‌نێوان به‌رپرسانى ئیسرائیل و سعوودیه له‌و سه‌ردانه‌دا، ئه‌نجام درابێت، گوتیشی: "گۆڕینه‌وه‌ى په‌یامه‌كان له‌ڕێگه‌ى به‌رپرسێكى باڵاى هه‌واڵگریی میسرییه‌وه بووه، كه باس له هه‌ڕه‌شه‌كانى ئێران و پلانى ئاشتیی ناوچه‌كه كه ئیداره‌ى تره‌مپ بناغه‌ى بۆ داناوه، كراوه و، به (ڕێككه‌وتنى سه‌ده) ناو ده‌برێت".
هه‌روه‌ها ئه‌وه‌ش خراوه‌ته‌ڕوو، كه محه‌مه‌د بن سه‌لمان، جێنشینی سعوودیه و نێرده‌ى وڵاته‌كه‌ى له كۆمكاری عه‌ره‌بى له‌گه‌ڵ بینیامین نه‌ته‌نیاهۆ، سه‌رۆكى ئیسرائیل، له‌باره‌ى هه‌ڕه‌شه‌كانى ئێران بۆ سه‌ر ناوچه‌كه و ڕووبه‌ڕووبوونه‌وه‌ى هه‌ژموونى تاران، هه‌ڵوێستى هاوشێوه‌یان هه‌بووه.
فراوانبوونى هه‌ژموونى ئێران له‌ناوچه‌ى خۆرهه‌ڵاتى ناوه‌ڕاست و ده‌ست تێوه‌ردان له‌كاروبارى هه‌ریه‌ك له وڵاتانى عێراق، سووریا، یه‌مه‌ن، لوبنان و به‌حره‌ین، بووه‌ته جێی مه‌ترسى و نیگه‌رانى وڵاتانى كه‌نداو و ئیسرائیل.
هه‌ر بۆیه پێشتر چه‌ندین جار به فه‌رمى له‌لایه‌ن ئه‌مریكاوه داواى لێكراوه، میلیشیاكانى له عێراق بكشێنێته‌وه.
9/3/2018
