^{لە دوایین ڕۆژەکانی ساڵدا بەشێکی زۆری خەڵکی لە ئێران بە دژی نادادپەروەریی ئابووری و کۆمەڵایەتی ناڕەزایەتییان دەربڕیوە.}

^{قەیرانی ئابووری و دەستەوەستانی بەرپرسانی ڕێژیمی ئێران بە هۆی ناشارەزایی لە چارەسەریی قەیرانەکان و گەندەڵییەکانیان، لە زۆر شوێنی ئێراندا ناڕەزایەتی و مانگرتنی سەرتاسەریی هاتووەتە ئاراوە.}

^{لەم پێوەندییەدا کاسبکارانی بانە و پیرانشار لە ڕۆژی شەممە ٥ی ڕەشەممەی ١٣٩٦ی هەتاوی، بە هۆی داخرانی بازاڕە سنوورەییە نافەرمییەکان و کردنەوەی سنووری فەرمیی پیلەوەری دەستیان داوەتە ناڕەزایەتی و مانگرتن و لەسەر ئەو باوەڕن کە ئەم گەڵاڵەیە ڕەوتی کۆڵبەری نالەبارتر و قازانج و سوودی دەوڵەت زیاتر دەکات.}

^{دوابەدوای مانگرتن لە بانە و پیرانشار، بە نیشانەی هاودەنگی و هاوپێوەندیی لەگەڵ کاسبکارانی ئەم دوو شارە، ڕۆژی چوارشەممە ڕێکەوتی ٩ی ڕەشەممە دووکاندارانی پاساژەکانی "خورشید زرێوار" و "کوردستان" شاری مەریوانیش دەستیان داوەتە ناڕەزایەتی و مانگرتنەوە.}

^{لە لایەکی دیکەوە، ناڕەزایەتییەکان کەرتی وەرزێڕیشی گرتۆتەوە و سەدان وەرزێڕی شاری "وەرزەنە" لە پارێزگای ئیسفەهان لە هەمبەر بڕینی "حەقی ئاو" لە بەردەم بەخشداریی ئەو شارە کۆبوونەوەی ناڕەزایەتییان بەڕێوە بردووە.}

^{لە درێژەی ناڕەزایەتییەکان لە ئێراندا ژمارەیەک لە پزیشکانی تاران، بە بۆنەی نەدانی مێهرنامەی پزیشکی و مۆڵەتی کار بە خاوەن بڕوانامەکانی بەشی خواردن "تغذیە" لە بەردەم وەزارەتی بێهداشت کۆبوونەوەی ناڕەزایەتییان ڕێکخست.}

^{لە درێژەی ئەم ناڕەزایەتییانە سەدان کەس لە خاوەن بەلەمەکان و کرێکاری کەشتییەکانی پارێزگای بووشەهر، لە هەمبەر هاتنی شتومەک لە پێش ئیدارەی گومروکی ئەو شارە کۆبوونەوەی ناڕەزایەتییان بەڕێوە برد و بە شێوەیەکی سمبۆلیک سفرە بەتاڵەکانی خۆیان لە شوێنی کۆبوونەوەکە ڕاخست، ئەم ناڕەزایەتییە بە هۆی ئەوە بەڕێوە چووە، کە سەدان کانتینێر لە لایەن سپای پاسدارانی ڕێژیم و دەستوپێوەندییەکانی بە شێوەی ڕانتی هاوردەی وڵات دەکرێت، لە حاڵێکدا ئیدارەی گومروکەکانی باشووری ئێران پێشیان بە هاوردنی بەشێکی زۆر لە شتومەکەکان لە لایەن مەلەوان و کرێکارانی کەشتییەکان گرتووە.}

6/3/2018