^{وتەبێژی هێزە چەکدارەکانی ڕێژیمی ئێران، لەنێوچوونی هەموو مووشەکە کورتمەودا و دوورمەوداکانی ئامریکا و ئورووپای بە تەنیا مەرجی وڵاتەکەی بۆ دانیشتن و وتووێژ لەسەر بەرنامەی مووشەکی ناو بردووە.}

^{مەسعود جەزایری، وتەبێژی هێزە چەکدارەکانی ڕێژیمی ئێران، ڕۆژی شەممە ١٢ی ڕەشەممەی ١٣٩٦ی هەتاوی، داواکاریی بەرپرسانی ئامریکایی و ئورووپایی بۆ سنووردارکردنی بەرنامەی مووشەکییەکانی ئێرانی بە خەون و خەیاڵ زانیوە.}

^{دانڵد ترامپ بەرنامەی مووشەکی ڕێژیمی ئێرانی بە لەمپەڕێکی گەورە لە بەردەم بەردەوامی وڵاتەکەی لەسەر ڕێکەوتنی بەرجام دەزانێت و داوای لە وڵاتانی جیهان کردووە، هەتا گوشارەکانیان بۆ سەر ئێران بە مەبەستی سنووردارکردنی بەرنامەی مووشەکە بالستیکییەکانی ئەو ڕێژیمە زیاتر بکەنەوە.}

^{لە بەرانبەر ئەو هەوڵە جیهانیانەدا عەلی‌ئەکبەر ویلایەتی، ڕاوێژکاری ڕێبەری کۆماری ئیسلامی ئێران لە کاروباری نێونەتەوەیی، ڕۆژی شەممە ١٢ی ڕەشەممە ڕایگەیاندووە: "هیچ وڵاتێک ناتوانێت بۆ ئێمە ڕێوشوێن دیاری بکات".}

^{بڕیارە کە ڕۆژی دووشەممە ١٤ی ڕەشەممە "ژان ئەیو لۆدریان"، وەزیری دەرەوەی فەڕانسە بچێتە تاران، ناوبراو ڕایگەیاندووە، کە لە دانیشتنەکانیدا باس لە نیگەرانی وڵاتەکەی بە نیسبەت مووشەکە بالستیکییەکانی ڕێژیمی ئێران دەکات.}

^{ئامریکا و هاوپەیمانەکانی، ڕێژیمی ئێران بەوە تۆمەتبار دەکەن، کە لە بڕیارنامەی ٢٢١٦ی ڕێکخراوی نەتەوە یەکگرتووەکان بە نیسبەت یەمەن پێشێلکاری کردووە و مووشەکە بالستیکییە سازکراوەکانی ئەو وڵاتە کە لە لایەن میلیشیاکانی حووسی یەمەن و حیزبوڵڵای لوبنانەوە بەکار دەبرێن، ئەمنییەت و تەناهی ڕۆژهەڵاتی نێوەڕاستیان خستووەتە مەترسییەوە.}

5/3/2018