^{کەناڵێکی ئەمریکی بڵاوی دەکاتەوە، کە کۆماری ئیسلامیی ئێران بنکەیەکی سەربازی لە نزیک دیمەشقی پایتەختی سووریا، دەکاتەوە.}

^{کەناڵی (فۆکس نیوز) لە راپۆرتێکدا ئاماژەی بەوە کردووە، کە ئێران ئەو بنکە سەربازییە بۆ هەڵگرتنی مووشەکە دوورهاوێژ و مامناوەندەکانی، بەکار دەهێنێت.}

^{بەپێی ئەو زانیارییانەی بە کەناڵەکە گەیشتووە، دوو کۆگای 500 مەتری لەناو سەربازگەکە بۆ هەڵگرتنی چەک و تەقەمەنی دروست کراون و بنکە سەربازییەکەش کەوتووەتە دووریی 12 کیلۆمەتر لە سەنتەری شاری دیمەشقەوە.}

^{پێشتر لەمانگی 12ـی 2017، سوپای ئیسرائیل رایگەیاند، بنکەیەکی سەربازیی ئێرانیان لە ناوچەی کەسوە لە گوندەوارەکانی دیمەشق، بۆردومان کردووە.}

^{لە دوای دروستبوونی شەڕی ناوخۆیی لە سووریاوە، سوپای قودسی ئێران، کە قاسم سولەیمانی فەرماندەیی دەکات، بە ناردنی چەک و میلیشیا شیعەمەزهەبەکان، هاوکاریی رژێمی سووریا لە دژی گرووپەکانی ئۆپۆزیسیۆنی ئەو وڵاتە، دەکات.}

^{لە مانگی ئاداری 2011ـەوە (نزیکەی هەشت ساڵە)، شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.}

^{بەهۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن هاووڵاتیی لە ناوخۆی وڵاتەکە، بۆ وڵاتانی دەوروبەر و جیهان ئاوارە بوون و زیاتر لە نیو ملیۆن کەسیش گیانیان لەدەست داوە.}

3/1/2018