^{لە نێوان دەروێشە گۆنابادییەکانی ئێران و هێزەکانی پۆلیس لە شاری تاران تێکهەڵچون ڕوویداوە و لە ئەنجامدا سێ پۆلیس و دوو بەسیجی کوژراون و ژمارەیەک دەروێشیش برینداربوون.}

^{دەروێشە گۆنابادییەکان کە لە ئێوارەی دوێنێوە بە مەبەستی دەربڕینی ناڕەزایی بەرامبەر بە دەستگیرکردنی نیعمەتوڵا ڕیاحیان یەکێک لە دەروێشەکانی گوناباد ، لە بەردەم بنکەیەکی پۆلیس لە باکوری تاران گردبوبوونەوە، بەرەبەیانی ئەمڕۆ کۆتاییان بە گردبوونەوەکەیان هێنا.}

^{ئێوارەی دوێنێ دەرێشەکان لە بەردەم بنکەیەکی پۆلیس گردبوونەوە و داوای ئازادکردنی دەروێشێک بە ناوی نعمەتوڵا ڕیاحییان کرد، کە بە وتەی ئەوان بە نایاسایی دەستگیرکراوە.}

^{هێزەکانی پۆلیس ئەو داواکارییەیان جێبەجێنەکرد و گردبوونەوەی دەروێشەکان بەرفراوان بووەوە، هێزەکانی پۆلیس هێرشیان کردە سەر گردبوونەوە و پاشان شەڕ ڕوویدا. لە ئەنجام ئە شەڕەدا ژمارەیەک دەروێش برینداربوون.}

^{هەروەها پاسێک کە پۆلیس بانگەشەی ئەوە دەکات هی دەروێشەکان بووە خۆی بە هێزەکانی پۆلیسدا کێشاوە و لە ئەنجامیدا سێ پۆلیس کوژراون. ئاژانسەکانی هەواڵی سەر بە ڕژیمی ئێران ،باسیان لە کوژرانی دوو بەسیجی ئەکەن.}

^{گردبوونەوەی دەروێشەکان و شەڕ و پێکدادانی نێوانیان لەگەڵ پۆلیس تا بەرەبەیانیی ئەمڕۆ بەردەوامی هەبوو. ، بە پێی هەواڵەکان زیاتر لە ٣٠٠کەس لە خۆپیشاندەران لەلایەن پۆلیسەوە دەسبەسەر کراوون،}

^{ئەمە لەکاتێکدایە کە هێزە ئەمنیەتییەکانی ئێران دەروێشەکان بە کردەوەی توندوتیژی تۆمەتبار ئەکەن، بەڵام دەروێشەکان لە ماڵپەری فەرمی خۆیاندا ڕایان گەیاندووە کە ئێمە هەر چەشنە کردەوێکی توندوتیژانە رەد ئەکەینەوە .}

21/2/2018