^{لە کەرکووک ئاڵای کوردستان بە هەموو شێوەیەک قەدەخەکراوە، لەناو ماڵ و ئۆتۆمبێلیشدا هێزی عێراقی ناهێڵن کورد ئاڵا هەڵکەن، وێنەی ئەو شەهیدانە لەسەر شەقامەکان لێکراونەتەوە کە باکگراوندیان ئاڵای کوردستان بووە.}

^{دەستی دژەکانی ئاڵای کوردستان گەیشتنە هەموو شوێنێکی کەرکووک، جگە لەسەر گۆڕی ئەو شەهیدانەی بەباوەڕیی شەکاوەیی ئەم ئاڵایەوە سەریان نایەوە.}

^{ئاڵای کوردستان لەسەر شەقامەکان یان لێکراونەتەوە یان دڕێندراون و سووکایەتییان پێکراوە، تەنانەت لەسەر بینای قوتابخانە کوردییەکانیش هێنراوەتە خوارەوەو ئێستا سروودی ئەی رەقیبیش لەزاری قوتابییان نایەتەدەر.}

^{لایەنە کوردستانییەکانیش ئاڵای سەرەوەی بیناکانیان لێکردووەتەوە و گواستویانەتەوە ژووری کۆبوونەوەکانیان، دەیانەوێ لەم قۆناخە بەدواوە بەیەکگرتوویی بەرەنگاری ئەو دیفاکتۆیە ببنەوە کە بەسەرییان سەپێنراوە.}

^{مەولوود رەسول، بەرپرسی مەڵبەندی یەکگرتووی کەرکووک بە رووداوی راگەیاند "تاوەکو ئێستا دۆخەکە نائاساییە، دۆسیەی ئەمنی لەدەست ئەو هێزانەیە، پێشتر لای کورد بوو، بەڵام ئێستا وانییە، دەتوانین بڵێین ململانێیەکی مەزهەبی و نەتەوەیی هەیە، ئێمە دەبێت مامەڵەیەکی نەتەوایەتی و کوردانە بکەین و لەیەک نزیک بین".}

^{پێشتر ئەنجوومەنی پارێزگا پشت ئەستوور بەمادەی 140و 115ـی دەستوور بڕیاری هەڵکردنی ئاڵای دابوو، دادگای فیدراڵی تانەی بڕیارەکەی رەتکردەوە، هەربۆیە سەرۆکی ئەنجوومەن پێشنیاز دەکات سکاڵا لەسەر داگرتنی ئاڵای کوردستان تۆماربکرێت.}

^{رێبوار تاڵەبانی، سەرۆکی ئەنجوومەنی پارێزگای کەرکووک بە رووداوی راگەیاند "ئێستا بەپێی دوا بڕیاری دادگای فیدراڵی، دەڵێت ئەمە کاروباری نێوخۆییە و بەپێی ماددەی 31 ئاماژەی پێداوە لەناوەڕۆکی بڕیارەکە، پانتایی هێشتووەتەوە و بڕیارەکەی ئێمە بۆ هەڵکردنی ئاڵا دەبێ وەک خۆی بڕوات، ئێستا ئەوەی نایەوێ ئاڵا بەرزەوەبکرێت پێویستە سکاڵای لەسەر بکرێت".}

^{لەدوای 16ـی ئۆکتۆبەرەوە تەنیا ئاڵای کوردستان قەدەخەکراوە، تورکمانەکان وەک ئاماژەی سەرکەوتن گەڕەکەکانیان شین دەکاتەوە و بەهۆی هەژموونی شیعیشەوە لەشارەکە درووشم و ئاڵا مەزهەبییەکان لەشوێنی ئاڵاکانی کوردستان بەرزکراونەتەوە.}

١٩/٢/٢٠١٨