^{ڕاوێژکاری وەزیری ئابووریی حکوومەتی ئێران، لە وتووێژێکدا ڕایگەیاند: ناڕەزایەتییە خەڵکییەکانی مانگی ڕابردوو لە ئێراندا، ڕووداوێکی سیاسی بوو، کە هەمووانی لەرزاند.}

^{ئەحمەد میدەری لە وتووێژێکدا لەگەڵ هەواڵدەریی کاری ئێران "ئیلنا"، ناڕەزایەتییە خەڵکییەکانی مانگی بەفرانباری بە بوومەلەرزەیەکی سیاسی شوبهاند و ڕایگەیاند: هێزی نیزامی ـ سیاسیی ئێران، توانایی بەڕێوەبەری قەیرانی شارە چووکەکانی ئەو وڵاتەی نییە.}

^{ئەو ئەندامەی مەجلیسی شەشەم لە ئێران ڕایگەیاند، ئەو بوومەلەرزە سیاسییە یان دەبێتە هۆی ئەوەی کە پێکهاتەی سیاسی ئێران بەهێز بێت، یان دەبێت هۆی ئەوەی کە ڕێبەرانی ئێڕان بە هۆش نەیەن و چاوەرێی ئەوە بن، کە بوومەلەرزەیەکی دیکە ڕوو نەدات.}

^{ناوبراو هەروەها بە ئاماژە کردن بە نارەزایەتییەکانی ٧٧ شاری ئێران وتی: ئەگەر چاوێک لەو شارانەی ئێران بکەین، کە لەوێدا نارەزایەتییەکان بووەتە هۆی کوژرانی هێندێک لە خەڵکی ناڕازی، ڕێژەی بەشداری کردن لە هەڵبژاردنەکان کەمتر لە شارەکانی دیکە بووە.}

^{ڕاوێژکاری وەزیری ئابووریی ئێران ئەو ناڕەزایەتییانەی وەکوو "ناڕەزایەتییە کەڵەکەکراوەکان" ناو برد و ڕایگەیاند: بەشداری نەکردنی خەڵک لە هەڵبژاردن بە واتای ناڕەزایەتیی هەموو نیزامە.}

^{ئەحمەد میدەری، هەروەها بە ئاماژە کردن بە بەرجام ڕایگەیاند: شکستی بەرجام خۆی هۆکاری ناڕەزایەتیی خەڵک بووە و خەڵکیش چاوەڕوانی ئەوە بوون، لە قۆناغی دووی هەڵبژرادنی سەرکۆماری ئاڵوگۆڕ لە ژیانی ئەوان پێک بێت، بەڵام سیاسەتەکانی سەرکۆماری ئامریکا بە خەڵکی سەلماند، کە بەرجام بەڕێوەناچێت و ژیانی ئەوانیش ئاڵوگۆڕی بە سەردا نایەت.}

^{بە وتە ڕاوێژکاری وەزیری ئابووریی ئێران، خەڵکی ئێران لەو باوەڕەدان، کە دەوڵەتی حەسەن ڕۆحانی هیج جۆرە ڕێکارێکی بۆ چارەسەریی کێشەکانی ئەوانی پێی نییە.}

15/2/2018