^{سەرکۆماری فەڕانسە وێڕای پشتگیری لە لێدوانەکانی ترامپ لەهەمبەر بەرنامەی مووشەکی کۆماری ئیسلامی، ڕایگەیاند: دەبێ بەرنامەی مووشەکی بالێستیکیی ئێران بکەویتە ژێر چاودێری نێونەتەوەیی.}

^{هەواڵدەریی ڕۆیتێرز لە ڕاپۆرتێکدا ئاماژەی بەوە کردووە، کە ئێمانۆئێل ماکرۆن، وێڕای ئاماژەکردن بە ڕێککەوتننامەی بەرجام ڕایگەیاندووە: هۆکاری ئەوەیکە فەڕانسە پێداگرە لەسەر مانەوە لەسەر بەرجام ئەوەیە، کە تا ئێستا هیج ڕێکارێکی باشتر بۆ کۆتایی هێنان بە کێشەی ناوکی ئێران نابینێت.}

^{ناوبراو لە پرێس‌کۆنفڕانسێکیشدا باسی لە ڕۆڵی کۆماری ئیسلامی لە یەمەن و سوریەدا کردووە و ڕایگەیاندووە: کۆماری ئیسلامی بەهۆی چالاکییە مووشەکییەکانی بووەتە هۆکاری ناسەقامگیری لە ڕۆژهەڵاتی ناڤیندا.}

^{لە درێژەی قسەکانیشیدا وتوویەتی: ئێمە دەبێ بۆ کۆنتڕۆڵ کردنی دۆخی ڕۆژهەڵاتی ناڤین، چاودێرییەکی وردمان لەسەر ڕێژیمی تاران و بەتایبەت بەرنامە مووشەکییەکانیان هەبێ.}

^{ئەم قسانەی ماکرۆن دوابەدوای ئەوە دێنە ئاراوە، کە دوێنێ چوارشەممە ڕێکەوتی ٢٥ی ڕێبەندانی ١٣٩٦ی هەتاوی، "ڕێکس تێلرسۆن" وەزیری دەرەوەی ئامریکا، لە کۆنگرەیەکی ڕۆژنامەوانیدا لەگەڵ "ئەیمەن ئەلسەدەفی"، هاوتا ئۆردۆنییەکەی ڕایگەیاند: "دەبێت قەیرانی سووریه بەپێی بڕیاری ٢٢٥٤ی شۆرای ئەمنییەتی ڕێکخراوی نەتەوە یەکگرتووەکان و وتووێژەکانی ئاشتی ژێنێڤ چارەسەر بکرێت".}

^{وەزیری دەرەوەی ئامریکا وتوویەتی: "دەبێ" ڕێژیمی ئێران سەربازەکانی و ئەو هێزانەش کە پاڵپشتـیان لێ دەکات لە سووریە بکشێنێتەوە.}

^{تێلرسۆن وتوویەتی: ئێران دەبێ هێزە سەربازییەکانی خۆی لە سوریە بباتە دەرەوە، تاکوو ئارامی بۆ ئەم وڵاتە بگەڕێتەوە؛ بەوتەی ناوبراو مەرجی سەرکەوتنی وتووێژەکانی ژێنێڤ بریتییە لە دەستێوەردان نەکردنی تاران.}

15/2/2018