^{محەممەد سدیق کەبوودوەند، چالاکی مافی مرۆڤ و دامەزرێنەری ڕێکخراوی داکۆکی لە مافی مرۆڤی کوردستان، لە ڕاگەیندراوێکدا، ڕەخنەی لە ویژدانە نەنووستووەکانی جیهان گرتووە، کە لە بەرانبەر هێرشی تورکیە بۆ سەر شاری عەفرین لە کوردستانی سووریە بێدەنگییان هەڵبژاردووە.}

^{دامەزرێنەری ڕێکخراوی داکۆکی لە مافی مرۆڤی کوردستان، داوا لە ویژدانە نەنووستووەکان دەکات، کۆتایی بە بێدەنگی خۆیان لە هەمبەر هێرشی دەوڵەتی تورکیە بۆ سەر عەفرین بێنن.}

^{لە بەشێکی ئەو ڕاگەیندراوەدا هاتووە: ئەردۆغان دەسەڵاتداری دەوڵەتی تورکیە، لە چەند ساڵی ڕابردوودا، بە پەروەردە کردن و ڕەوانە کردنی گرووپی تێرۆریستیی و داعشییەکان بۆ وڵاتانی عێراق و سووریە، دەستی لە کوژرانی هەزاران هاووڵاتیی بێتاوانی "کوردی"ی سووریە و عێراقیدا هەبووە و بەشداری چالاکانەی لەو پرۆسەدا کردووە.}

^{دەسەڵاتدارە خەیاڵپڵاوەکەی دەوڵەتی تورکیە، بە کۆکردنەوەی گرووپەگەلێ وەک: داعش و ئەلنەسرە و ئەلقاعدە و هەروەها هێندێک لە بەکرێگیراوان و جەنایەتکارانی هەڵهاتووی بار هێناوە و بە ڕەوانەکردنی دووبارەیان بۆ ڕۆژئاوا لەژێر ڕێنوینی ڕاستەوخۆی ئەرتەشە داگیرکەرەکەی، ئۆپراسیۆنی جەنایەتکارانەی وەچەکوژی نوێی کوردی لە وڵاتی سووریە ڕێکخستووە.}

^{ئەرتەشی داگیرکەر ئەردۆغان و گرووپە تێرۆریستییەکانی هاوپەیمانی، لە ماوەی ١٨ ڕۆژی ڕابردوودا، سەدان کەسی لە خەڵکی بێتاوان و بێماڵ و حاڵی کانتۆنی عەفرینی لە خوێندا گەوزاندووە.}

^{خەڵکی کورد بەداخەوە بە هۆی نەبوونی پشتیوانیی فەرمی و نێونەتەوەیی لە ئاستی جیهاندا و نەبوونی نوێنەر لە کۆمەڵگای نێونەتەوەیی و نەبوونی دەوڵەتی خۆی لە ڕۆژهەڵاتی نێوەڕاست، زیاتر لە ١٠٠ ساڵە کە دیلی دەوڵەتانی دەسنیشانکراو و قوربانی ساتوسەودای نادادپەروەرانەی ناوچەیی و جیهانی بووە.}

9/2/2018