^{لە كۆبوونەوەی ئەمڕۆی ئەنجوومەنی وەزیرانی هەرێمی کوردستاندا گفتوگۆ لەبارەی پڕۆژیەك دەكرێت بەناوی (خزمەت)، پڕۆژەكە بۆ كەمكردنەوەی رۆتینیاتی زۆرە لە فەرمانگە‌ و دامودەزگاكاندا و قوباد تاڵەبانی سەرپەرشتیی جێبەجێکردنی دەکات.}

^{ئەمڕۆ چوارشەممە 17-1-2018، ئەنجوومەنی وەزیرانی هەرێمی كوردستان بەسەرپەرشتیی نێچیرڤان بارزانی کۆدەبێتەوە، لە سەرەتای کۆبوونەوەکەدا وەزیرەكانی یەكگرتووی ئیسلامیی کوردستان دوای بڕیاری حیزبەکەیان بۆ کشانەوە لە حکومەت ماڵئاوایی دەكەن، پاشان پڕۆژەی خزمەت تاوتوێدەکرێت.}

^{نووری عوسمان، سەرۆكی فەرمانگەی هەماهەنگی و بەدواداچوون لە سەرۆكایەتیی ئەنجومەنی وەزیران بە (تۆڕی میدیایی رووداو)ی راگەیاند: "پڕۆژەكە لەلایەن قوباد تاڵەبانی، جێگری سەرۆكی حكومەتەوە سەرپەرشتی دەكرێت، بەشێوەیەكی گشتی باسی پێشكەشكردنی خزمەتگوزاری دەکات لە فەرمانگە حكومییەكاندا، ئەمەش لەپێناو كەمكردنەوەی رۆتینیاتی زۆر لە فەرمانگە‌ و دامودەزگاكاندا".}

^{هەر بەپێی ئەو پڕۆژەیە، هەر فەرمانگە‌ و دامودەزگایەكی حكومەت ماڵپەڕێکی ئەیلكترۆنی دەبێت، لەڕێگەی ئەو ماڵپەڕەوە پێداویستی هەر مامەڵەیەكی هاونیشتمانیان دەخرێتەڕوو. هاوكات بڕی پارەی تێچووی مامەڵەكەش ئاشكرادەكرێت.}

^{ماوەیەكی زۆرە ئەنجوومەنی وەزیرانی هەرێمی كوردستان هەفتانە كۆبوونەوەی ئاسایی خۆی دەكات، دوای كۆبوونەوەكانیش نێچیرڤان بارزانی، سەرۆكوەزیرانی هەرێمی كوردستان بڕیارەکان و نێوەڕۆکی کۆبوونەوەکان لە كۆنگرەیەكی رۆژنامەڤانیدا ئاشکرادەکات، وەڵامی پرسیاری رۆژنامەڤانانیش دەداتەوە.}

18/1/2018