^{خۆپێشاندان و ناڕەزایەتییەكانی خەڵكی ئێران دژ بە حكوومەت و دەسەڵاتی وڵاتەكەیان بۆ حەوتەم ڕۆژ بەردەوامی هەیە و لە زۆربەی شارەكانی ئێران ڕۆژانە خۆپێشاندەران دەست بە ناڕەزایەتیی دەربڕین دەكەن و ڕۆژ دوای ڕۆژیش خۆپێشاندانەكان فرەوانتر دەبێ، لە تەك ئەمەیشدا توندوتیژی ڕووبەڕووبوونەوەكان ڕوو لە زیادبوون و تا ئێستە 21 كەس لە ئەنجامی توندوتیژییەكانەوە گیانیان لە دەست داوە.}

^{بەگوێرەی ئەو گرتە ڤیدیۆییانەی لە تۆڕەكانی كۆمەڵایەتی بڵاو بوونەتەوە، هێزی تەناهی لە چەندان شاری ئێران بە چڕی بڵاوەیان پێ كراوە، بۆ ئەوەی خۆپێشاندانەكان بە كۆتا بێنن و ئارامی بۆ شارەكان بگێڕنەوە، بەڵام ئەمانە تا ئێستە نەبوونەتە هۆكارێك بۆ وەستاندن و كپكردنەوەی خواستنی خۆپێشاندەران، بگرە ئەوان سوورتر لە جاران دێنە سەر شەقام و ناڕەزایەتی دەردەبڕن.}

^{جێگری پارێزگای تارانی پایتەختی ئەو وڵاتە ئاشكرای كرد، زیاتر لە 450 خۆپێشاندەر لە ماوەی سێ ڕۆژی ڕابردوو تەنیا لە تاران گیراون و سەدانی تریش لە شارەكانی تری وڵاتەكە خراونەتە گرتووخانەوە، بەرپرسێكی دەسەڵاتی دادوەری ئێرانیش ئاشكرای كرد، بەشێك لە گیراوان دادگایی دەكرێن و هەندێكیان سزای لە سێدارەدانیان بەسەردا دەسەپێنرێ.}

^{لە ناوچەی ئەهواز خەڵكی بە ئاژانسی "ڕۆیتەرز"یان ڕاگەیاند، پۆلیس گازی فرمێسكڕێژی بەكار هێناوە و شەقامە سەرەكییەكانی داخستووە، بۆ ئەوەی كێوماڵی ناوچەكە بكەن و خۆپێشاندەران بگرن.}

^{تەلەڤزیۆنی فەرمی ئێرانیش بڵاوی كردەوە، نۆ كەس لە شاری ئەسفەهان گیانیان لە دەست داوە لە دوو ڕۆژی ڕابردوو، دوو لە كوژراوان ئەندامانی هێزەكانی تەناهین و شەش خۆپێشاندەریش گیانیان لە دەست داوە، لەوكاتەی هێرشیان كردووەتە سەر بنكەی پۆلیسی شارەدێی قەهدریجانی سەر بە شاری ئەسفەهان.}

^{بەرپرسانی باڵای ئێران و حكوومەتی ئەو وڵاتە دووپات لەوە دەكەنەوە، نابێ خۆپێشاندەران پەنا بۆ توندوتیژی ببەن و ڕێز لە داواكانیان دەگرن، بەڵام خەڵكی سوورن لەسەر خۆپێشاندان و ناڕەزایی دەربڕین.}

^{ڕۆژی پێنجشەمی هەفتەی ڕابردوو 28 كانوونی یەكەم/دیسێمبەر لە شاری مەشهەدی ئێران، خۆپێشاندان دەستی پێ كرد و چەندان شاری تری گرتەوە، بۆ ڕۆژانی دواتر خۆپێشاندانەكان گوازرانەوە تارانی پایتەختی ئەو وڵاتە و ئێستەیش ڕۆژانە لە زۆرینەی شارەكانی ئێران خۆپێشاندانە و هێزەكانی تەناهی وڵاتەكەیش لە چەندان شوێن لەگەڵ خۆپێشاندەران تووشی پێكدادان و ڕووبەڕووبوونەوە بوونەتەوە. هۆكاری سەرەكی دەست كردن بەو خۆپێشاندانانە بۆ بەرزبوونەوەی ڕێژەی بێكاری و خراپی دۆخی ئابووری و ژیانی خەڵكی ئێران و تەشەنەسەندنی گەندەڵی دەگەڕێتەوە.}

3/1/2017