٥٠كه‌س لە كرێكارانی شیركه‌تی سپیایی به‌هار داڵاهوو “مانیزان”ی كرماشان به‌هۆی پێنه‌دانی مووچه‌ی دواكه‌وتوویی ٢ مانگ، له‌به‌رده‌م پارێزگاری ئه‌و شاره ناڕه‌زایه‌تییان ده‌ربڕی.
به‌پێی ڕاپۆرتی ناوه‌ندی دێموكراسی و مافی مرۆڤی كوردستان، نزیك به ٥٠ كرێكاری شیركه‌تی ته‌عاونی سپیایی به‌هار داڵاهوو “مانیزان”ی كرماشان به‌هۆی پێنه‌دانی مووچه‌ی دواكه‌وتوویی ٢ مانگ له‌وه‌پێش له‌به‌رده‌م پارێزگاری ئه‌و شاره كۆبوونه‌وه و ناڕه‌زایه‌تیی خۆیان ده‌ربڕه و خوازیاری هه‌قده‌سته‌كانیان بوون.
ئیداره‌ی ته‌عاون، كار و خۆشبژیویی كۆمه‌ڵایه‌تیی پارێزگای كرماشان له‌و باره‌یه‌وه گوتی، كرێكارانی مانیزان به مه‌به‌ستی وه‌رگرتنی مووچه‌ی ٢ مانگ دواكه‌وتوویان له‌به‌ر ده‌ركی پارێزگاری كرماشان كۆبوونه‌وه و داوایان له خاوه‌نكاره‌كه‌یان كرد كه به‌خێرایی بۆیان دابین بكا و پاش به‌ڵێنی خاوه‌نكار و ئیداره‌ی كار بڵاوه‌یان پێكرا.
ئیداره‌ی كاری كرماشان وێڕای ئاماژه به مووچه‌ی دواكه‌وتوویی ئه‌و كرێكارانه گوتی، بۆ چاره‌سه‌ریی ئه‌و كێشه‌یه هه‌موو تواناكانمان وه‌گه‌ڕ ده‌خه‌ین و كرێكاران به مافی خۆیان ده‌گه‌یه‌نین.
شایانی باسه شیركه‌تی ته‌عاونیی به‌رهه‌مهێنانی سپاپیی به‌هار داڵاهوو زیاتر له ١٠٠ كرێكاری هه‌ی و، ٥٠ كه‌سیان مووچه‌كانیان دواكه‌وتبوو.
به هۆی قه‌یرانی ئابووریی له ئێران و مایه‌پووچبوونه‌وه‌ی به‌شی هه‌ره زۆری شیركه‌ته‌كانی به‌رهه‌مهێنان، ئه‌و كرێكارانه له‌وه نیگه‌ران بوون ئه‌و شیركه‌ته‌ش وه‌ك ئه‌وانی دیكه هه‌ڵوه‌شێته‌وه پاره‌كه‌یان لێ بخورێ.
٢٥/١٢/٢٠١٧
