^{بەمەبەستی بە جینۆسایدناساندنی تاوانەكانی دژ بە هاووڵاتیانی كورد لە قەزای خورماتوو، بەدەستی میلیشیا شیعەكان، ڕێكخراوێكی ئەمریكی و ژمارەیەك ڕۆژنامەنووسی فەرەنسی و کەدەندی و پارێزەران بۆ لێکۆڵینەوە و تۆمارکردنی تاوانەکان سەردانی ئیدارەی گەرمیان دەكەن.}

^{بەپێی ڕاگەیەندراوێكی ئیدارەی گەرمیان، كە وێنەیەكی بۆ (باسنیوز) نێردراوە "ژمارەیەك لە پارێزەران بە هاوكاریی ڕێكخراوی AEHS ی ئەمریكی لەپێناو بە جینۆسایدناساندنی تاوانەكانی دژ بە هاووڵاتیانی كوردی قەزای خورماتوو، دەستیان کردووە بە تۆماركردن و دۆكیۆمێنتكردنی هەموو تاوانە دژە مرۆییەكانی وەك كوشتن و دەستدرێژیی سێكسی و تاڵانكردن و سووتاندنی ماڵەكان کە ئەنجام دراون".}

^{بەپێی ڕاگەیەندراوەكە "بۆ ئەو مەبەستە ڕۆژی 18/12/2017 تیمێكی پارێزەران و ڕێكخراوەكە سەردانی ئیدارەی گەرمیانیان كردووە و داوای هاوكاری و هەماهەنگی ئیدارەی گەرمیان و فەرمانگە پەیوەندیدارەكانیان كردووە، بەو پێیەی زۆرینەی هاووڵاتیانی خورماتوو ئاوارەی سنووری گەرمیانن".}

^{لە ڕاگەیەندراوەكەدا ئاماژە بەوەش دراوە "سەرپەرشتیاری ئیدارەی گەرمیان بە تیمەكەی گوتووە بە جینۆسایدناساندنی ئەو تاوانانە و ناساندنی بە هەموو دنیا لە چوارچێوەی یاسا نێودەوڵەتییەكان زۆر گرنگە و لەو پێناوەشدا ئامادەی هەر هەماهەنگییەكین لە كاتی ئەنجامدانی كارەكانتاندا لەم سنوورە".}

^{لەلایەكیترەوە و بەمەبەستی كۆكردنەوەی زانیاری لەسەر دۆخی قەزای خورماتوو و ڕەوشی ئاوارەكان و ئەو تاوانانەی بەرامبەریان كراوە، ڕۆژی 23/12/2017 تیمێك لە لێكۆڵەر و ڕۆژنامەنووسی فری لانسی كەنەدی ـ فەڕەنسی لەگەڵ سەرپەرشتیاری ئیدارەی گەرمیان كۆبوونەوە.}

^{ڕاگەیاندنی ئیدارەی گەرمیان، لە ڕاگەیەندراوێكدا كە وێنەیەكی بۆ (باس) نێردراوە، ڕوونیكردووەتەوە "بەمەبەستی لێكۆڵینەوە لەسەر ڕەوشی خورماتوو و ئەنجامدانی ڕاپۆرتی ڕۆژنامەوانی و بڵاوكردنەوەی لە ڕۆژنامەكانی فەڕەنسا و كەنەدا، تیمێك لە لێكۆڵەر و ڕۆژنامەنووسی فری لانسی كەنەدی ـ فەڕەنسی سەردانی ئیدارەی گەرمیانیان كردووە بۆ وەرگرتنی زانیاری ورد و ڕاست لەسەر دۆخەكە".}

^{بەپێی ڕاگەیەندراوەكە "تیمەكە جەختیان لەوەش كردووەتەوە كە ئەنجامدانی لێكۆڵینەوە و كۆكردنەوەی ئەو زانیارییانە و بڵاوكردنەوەی لە ڕۆژنامەكانی فەرەنسا و كەنەدا، ڕۆڵێكی گەورەی دەبێت لە ناساندنی كەیسی خورماتوو بۆ جیهانی دەرەوە و بۆ بەدەگەوەهاتنی كۆمەڵگەی نێودەوڵەتی".}

^{لە ڕاگەیەندراوەكەدا ئاماژە بەوە دراوە كە "تیمەكە پرسیاری بارودۆخی ناجێگری قەزای خورماتووی لە پاش ڕووداوەكانی 16 ی ئۆكتۆبەر و گوزەرانی ئاوارەكان و كێشەی نێوان پێكهاتەی كورد و توركمانی قەزاكەیان كردووە لەگەڵ هەوڵەكانی گەیاندنی هاوكاری بۆ ئاوارەكان و دۆكیۆمێنتكردنی تاوانەكان و چارەسەری كێشەكان و گەڕانەوەی ئاوارەكان بۆ شوێنەكانی خۆیان كردووە و لەلایەن سەرپەرشتیاری ئیدارەی گەرمیانەوە بە وردی وەڵام دراونەتەوە".}

25/12/2017