٣ چالاكی كرێكاری له شاری سنه له‌لایه‌ن ئیداره‌ی ئیتلاعات بانگهێشت كران.
به‌پێی ڕاپۆرتی هێرانا، ڕۆژی ڕابردوو جه‌ماڵ یووسفی له ئه‌ندامانی شاخه‌وانیی چل چه‌مه و له چالاكانی كرێكاری بۆ سێهه‌مین جار له ماوه‌ی یه‌ك حه‌وتوودا له‌لایه‌ن ئیداره‌ی ئیتلاعاتی له شاری سنه بانگكراوه و له پێوه‌ندی له‌گه‌ڵ ڕێوڕه‌سمی نه‌ورۆ و كۆمه‌ڵێك چالاكیی دیكه‌ی لێكۆڵینه‌وه‌ی لێكراوه.
له هه‌مان ڕۆژدا ئه‌حمه‌د قه‌مه‌ری چالاكی مه‌ده‌نی له‌لایه‌ن هه‌مان ئیداره به مه‌به‌ستی به‌ڕێوه‌بردن و به‌شداریكردن له ڕێوڕه‌سمی نه‌ورۆزی ١٣٩٦ لێكۆڵینه‌وه‌ی لێكرابوو.
له‌لایه‌كی دیكه‌وه ڕۆژی ٢٠ی سه‌رماوه‌ز له پێوه‌ندییه‌كی ته‌له‌فوونیدا محه‌ممه‌د عه‌زیری له ئه‌ندامانی كۆمیته‌ی هاوئاهه‌نگی بۆ یارمه‌تیگه‌یاندنی پێكهێنانی ڕێكخراوی كرێكاری بانگی ئیداره‌ی ئیتلاعات له شاری سنه كراو لێكۆڵینه‌وه‌ی لێكرا.
هه‌روه‌ها مزه‌فه‌ر ساڵح نیاش، چالاكی كرێكاری له لایه‌ن دادسه‌رای شۆڕش له شاری سنه پێی ڕاگه‌یه‌ندراوه كه له ماوه‌ی ١٠ ڕۆژی داهاتوودا سه‌ردانی ئه‌و شوێنه بكا و ناوبراو پێشتریش به هۆی چالاكی كرێكاری بانگكرابوو و به شێوه‌ی كاتی ئازاد كراوه.
15/12/2017
