^{لە بەیانی ئەمڕۆ دووشەمەوە تا نیوەڕۆ، فڕۆكە جەنگییەكانی توركیا بە ئاسمانی دەڤەری برادۆست سووڕاونەتەوە و چەندان جار بۆردمانی ناوچەكەیان كردووە بە بیانووی بە ئامانج گرتنی بنكە و بارەگاكانی پەكەكە لەو ناوچەیەدا.}

^{ئیحسان چەلەبی بەڕێوەبەری شارەدێی سیدەكان بە "وشە"ی ڕاگەیاند، لە سەعات نۆی بەیانی ئەمڕۆ دووشەم تا سەعات 11ی پێش نیوەڕۆ، فڕۆكە جەنگییەكانی توركیا شەش جار لەسەر یەكتر ناوچەی ئیشمێ و چیای بەنی دەڤەری برادۆستیان بۆردمان كرد كە دەكەوێتە سنووری شارەدێی سیدەكان.}

^{زیاتر گوتی، هاووڵاتییانی ناوچەكە هیچ زیانێكی گیانی و مادییان بەرنەكەوتووە، ناشزانرێ ئاخۆ لە ئەنجامی بۆردمانەكان زیان بەر چەكدارانی پەكەكە كەوتووە یان نا.}

^{بەگوێرەی ئامارێكی بەڕێوەبەرایەتیی شارەدێی سیدەكان، لە ماوەی ساڵی 2017 فڕۆكە جەنگییەكانی توركیا و تۆپخانەكانی ئێران 26 جار بۆردمانی دەڤەری برادۆستیان كردووە و لە ئەنجامدا هاووڵاتییەك گیانی لە دەست داوە و زیانی مادیی زۆریش بەر باخ و پاوانی ناوچەكە گەیشتووە.}

^{شارەدێی سیدەكان سەر بە شارۆكەی سۆرانە و كەوتووەتە سێگۆشەی سنووری نێوان هەرێمی كوردستان و ئێران و توركیا، 250 گوندی بەسەرەوەیە و زیاتر لە 100 گوندی بەهۆی بوونی چەكدارانی پەكەكە لە ناوچەكە و بۆردمانی بەردەوامی فڕۆكەكان چۆڵ كراوە و ئاوەدان نەكراونەتەوە.}

11/12/2017