ده‌سه‌ڵاتدارانى ئێران، له‌ماوه‌ى 22 تا 29ى تشرینی دووه‌مى 2017، له گرتووخانه‌كانیدا 18 زیندانیكراوى له‌سێداره داوه،كه 10 له‌سێداره‌دراویان له گرتووخانه‌ى جه‌وهه‌رده‌شت له شارى كه‌ره‌ج بووه و له ڕۆژى چوارشه‌ممه 29ى تشرینی دووه‌م ئه‌نجام دراون. هه‌روه‌ها 6 زیندانیكراوى تر له نێوان 22 و 26ى تشرینی دووه‌م له گرتووخانه‌ى ته‌بریزی ناوه‌ندیی له‌سێداره دراون. له ڕۆژى 28ى هه‌مان مانگادا دوو زیندانیكراوى تر له گرتووخانه‌كانى "بابل" له باكوورى ئێران و شارى "قائین" له خۆرهه‌ڵاتى ئێران، له‌سێداره دراون.
به‌پێی به‌یاننامه‌یه‌كی ئه‌میندارێتى ئه‌نجومه‌نى نیشتمانى به‌رگری ئێران، كه باره‌گاكه‌ى له (پاریس)ـه و وێنه‌یه‌كی ده‌ست (باسنیوز) كه‌وتووه، له‌سێداره‌دانه‌كان هاوكات بوون له‌گه‌ڵ سه‌ردانى شاندێك له گروپى په‌یوه‌ندییه‌كانى په‌رله‌مانى ئه‌ورووپا له‌گه‌ڵ ئێران، بۆ شارى تاران.
هه‌روه‌ها ئاماژه به‌وه دراوه، كه سه‌ردانى شانده ئه‌ورووپیی و بیانییه‌كان بۆ ئێران له ژێر هه‌ر ناو و ناویشان و بیانوویه‌كدا بێت، ته‌نها ده‌بێته مایه‌ی هاندانى ڕژێمى تاران له‌سه‌ر به‌ردوامبوونى كوشتن و له‌سێداره‌دانى هاووڵاتیانی بێتاوان.
داواشكراوه، كه په‌یوه‌ندییه‌كان له‌گه‌ڵ ئه‌و ڕژێمه، مه‌رجداربێت به باشكردنى دۆخى مافى مارۆڤ له ئێران و ڕاگرتنى سزاى له‌سێداره‌دان.
2/12/2017
