^{یاتر لە چوار هەزار چالاکڤانی رۆژهەڵاتی کوردستان و ئێرانی داوا دەکەن حکومەتی ئێران بودجەی دیاریکراو بۆ هاوکاریکردنی زیانلێکەوتووانی بوومەلەرزە لە کرماشان زیادبکات و قەرەبووی گەشەنەکردوویی ئەو ناوچانە بکاتەوە.}

^{چوار هەزار و 522 کەس لە چالاکڤانان و خۆبەخشانی رۆژهەڵات و ناوچەکانی دیکەی ئێران، کە بەشێکیان لە کۆکردنەوە و گەیاندنی هاوکارییەکان بۆ ناوچە بوومەلەرزەلێدراوەکانی کرماشاندا بەشدار بوون، نامەیەکی کراوەیان ئاراستەی سەرۆککۆماری ئێران کرد.}

^{لە نامەکەدا هاتووە، ئەو بڕە پارە دیاریکراوەی کە بەشێوەی بێبەرامبەر و قەرز بڕیارە بدرێتە زیانلێکەوتووان، بەشی ئەوە ناکات کە خانووەکانیانی پێ دروستبکەنەوە. دەشڵێن ئەگەر بتوانن خانووی پێ دروستبکەنەوە، ماڵەکانیان دووبارە ستاندارد نابێ و لە بەرامبەر بوومەلەرزە خۆڕاناگرێت.}

^{بەگوتەی ئەو چالاکڤانانە، ئەگەر حکومەت بە قەرز پارەی دروستکردنەوەی خانووەکانیان بدات بە زیانلێکەوتووان، ئەوان بەهۆی کەمی داهات و نەبوونی کار، لە گەڕاندنەوەی قەرزەکان تووشی کێشە دەبن.}

^{ئەوان هەروەها دەڵێن، حکومەتی ئێران پێویستە بەر لە خەرجکردنی پارە لە عێراق، لوبنان، سووریا و فەڵەستین، بەپێی دەستوور شوێنی ژیانی پێویست بۆ خەڵکی ئێران دابینبکات.}

30/11/2017