^{ژمارەی ئەو کەسانەی کە لە هێرشی سەر مزگەوتەکەی ناوچەی سینا لە میسر کوژران بۆ ٣٠٥ کەس بەرزبووەوە.}

^{میدیاکانی میسر ئەمڕۆ لە زاری داواکاری گشتی وڵاتەکەوە بڵاویانکردەوە، لەناو ئەو ٣٠٥ کوژراوەدا ٢٧ کەسیان منداڵن و پێدەچێت ژمارەکە بەرەو زیادبوون بڕوات.}

^{هاوکات داواکاری گشتی میسر ئاماژەی بەوەش کردووە، ئەو چەکدارانەی هێرشەکەیان ئەنجامداوە ئاڵای داعشیان پێبووە، هەرچەندە هەتا ئێستا هیچ لایەنێک بەرپرسیارێتی خۆی لە هێرشەکە ڕانەگەیاندووە.}

^{دوێنێ لەکاتی ئەنجامدانی نوێژی هەینی لە یەکێک لە مزگەوتەکانی شارۆچکەی بیر عەبد لە نزیک عەریش لە سینا، تەقینەوەیەک ڕوویدا و دواتر چەکداران دەستڕێژی گوللـەیان کردە سەر نوێژخوێنان، بەهۆیەوە تا ئێستا ٣٠٥ کەس کوژراون و زیاتر لە ١٠٠ کەسیش برینداربوون.}

^{بە پێی زانیارییەکانی داواکاری گشتی میسر ژمارەى چەکدارەکان ٢٥ بۆ ٣٠ چەکداربوون و لە ڕێگەى چوار ئۆتۆمبێلی تایبەتەوە هاتوونەتە شوێنەکە و دوای هێرشەکەش هەڵاتوون.}

26/11/2017