کازم ئیمان‌زادە رۆژنامەنووس و بەرپرس و خاوەن ئیمتیازی مەڵپەڕی “هیوانیوز” و خەڵکی شاری سنە، حەوتووی داهاتوو دادگایی دەکرێ.
بە پێی ڕاپۆرتی هەواڵدەریی موکریان بڕیارە رۆژی ٢٢ی خەزەڵوەر کازم ئیمان‌زادە لە لقی ١٠٢ی دادگای سزای شاری سنە بەتاوانی شێواندنی ڕای گشتی، بڵاوکردنەوەی هەواڵی ناڕاست بە دژی نیزام و بێ ڕیزی کردن بە پیرۆزییەکان و هەواڵدان بەدژی ئاسایشی نیشتمانی و پەرەپێدان بە ناکۆکیی نەتەوەیی و ئایینی دادگایی بکرێ.
شایانی باسە بێ‌رێزی کردن بە پیرۆزییەکان و شێواندنی ڕای گشتی لە بەرچاوترین تۆمەتە باوەکانی سەرڕێی رۆژنامەنووسان لە ئێران و بەتایبەتی لە کوردستانە، کە زۆرجار هەوڵدان بە دژی ئاسایشی نەتەوەیی پێ زیاد دەکرێ.
جێگری چاپەمەنی و ڕاگەیاندنی ئیدارەی فەرهەنگ و ئیرشادی ئیسلامی شاری سنە، لە لێدوانێکی رۆژنامەوانی‌دا وێڕای پشتڕاست کردنەوەی ئەو هەواڵە باسی لە ئامادەبوونی هەیئەتی مونسیفە لە رۆژی دادگایی کردنی ئەو رۆژنامە نووسە کوردە کرد کە رۆژی ٢٢ی خەزەڵوەر بەڕێوەدەچێ.
11/11/2017
