^{نهێنیی پەیوەندیی سەرۆکی کوژراوی رێکخراوی تیرۆریستی قاعیدە و کۆماری ئیسلامیی ئێران ئاشکرا دەبێت.}

^{بەپێی هەواڵێکی رۆژنامەی (شەرقولئەوسەت)، مایک بۆمبیۆ، بەڕێوەبەری دەزگای هەواڵگریی ئەمریکا (سی ئای ئەی) رایگەیاندووە، لە رۆژی کوژرانی ئوسامە بن لادن، سەرۆکی قاعیدە، هێزە ئەمریکییەکە 470 هەزار فایلی لە خانووەکەی بن لادن دەستکەوتووە.}

^{مایک بۆمبیۆ هەروەها رایگەیاندووە، ئاشکراکردن و بڵاوکردنەوەی گرتە ڤیدیۆییەکان و تۆمارە دەنگییەکانی ئوسامە بن لادن رگا بۆ ئەمریکییەکان خۆش دەکات، لە پەیوەندییەکانی قاعیدە و پیلانە تیرۆریستییەکانی تێ بگات.}

^{بەپێی ئەو بەڵگانەی لە خانووەکەی سەرۆکی کوژراوی قاعیدە دەستکەوتووە و بڵاو کراوەتەوە، دەردەکەوێ، کە ئێران پێشنیازی مەشقکردن و پێدانی چەکی داوەتە ئوسامە بن لادن، بەو مەرجەی هێرش بکاتە سەر بەرژەوەندییەکانی ئەمریکا لە کەنداوی عەرەبی.}

^{ئوسامە بن لادن لە رۆژی 2/5/2011 لە ئەنجامی ئۆپەراسیۆنێکی تایبەتی هێزێکی تایبەتی ئەمریکی لە شاری ئەبوەت ئاباد لە پاکستان، کوژرا.}

2/11/2017