٧ی خەزەڵوەر تا ١٣ی خەزەڵوەر لە ئێران بە حەوتووی بەسیج ناودێر کراوەو لەو ٧ رۆژەدا کۆمەڵیک چالاکی و ڕیوڕەسمی ئەمنی و نیزامی لە سەرجەم شارەکانی ئیران بەتایبەتی لە شارەکانی رۆژهەڵاتی کوردستان لە لایەن سپای پاسداران و لق‌وپۆپەکانییەوە بەڕێوە دەچێ.
ئەمساڵ هاوکات بوونی ئەو حەوتەیە لەگەڵ رووداوەکانی هەرێمی کوردستان و دەستێوەردانی ئاشکرای سپای پاسداران لە هێرش و پەلامار بۆ سەر باشووری کوردستان بە هاوکاری حەشدی شەعبییەوە لە یەکەم رۆژەکانی ئەو حەوتەیە بەشێک لە شار و ناوچە سنوورییەکانی رۆژهەڵاتی کوردستان میلیتاریزە کراون و کەشێکی ئەمنیەتی بەسەریان‌دا زاڵە.
رۆژی ڕابردوو سپای پاسداران هێزیکی زۆری لە ناوەندەوە هێناوەتە کوردستان و لە زۆربەی شارەکانی رۆژهەڵاتی کوردستان هێزەکانی ڕژێم لە ئامادەباشیدان و بەبیانوی مانۆری نیزامی لە شەقامەکانیش‌دا سەنگەر هەڵچنراون.
ئەم مانۆرە نیزامییە بە تایبەتی لە نێوشاری مەهاباد و شارەکانی پارێزگای ورمێ دەگەڕێتەوە بۆ ئەوە کە بڕیارە لەم حەوتوویە‌دا کۆبوونەوەی بەکڕێگیراوانی رێژیم لە ژێر”ناوی پێشمەرگە موسڵمان” لە شاری مەهاباد بەڕێوەبچێ و هەر بۆ ئەو مەبەستەش سپای پاسداران و ئیتلاعات لەو شارەدا ڕێوشوێنی ئەمنیەتییان گرتووتەبەر.
جێی وەبیرهێنانەوەی پێشمەرگە موسڵمان بە کۆمەڵێک لە ئەندامان و بە کرێگیراوانی سپای پاسداران دەگوترێ
کە لە ساڵی ١٣٥٨ی هەتاوی و لەسەروبەندی هێرشی دەوڵەتی ناوەندی بۆسەر کوردستان لە لایەن پاسدار محەممەد برۆجێردی و عەبدوڵڵای جەماران و چەند کەسی دیکە لە سەرکردەکانی سپای پاسداران بە مەبەستی شەڕ و لە ناوبردنی تێکۆشەرانی کورد، ڕێکخرا.
ئەو ڕێکخراوەیە بە وەرگرتن و چەکدارکردنی کەسانی سووک نەفس و خۆجێی لە ڕێکەوتی ١٠ی ڕێبەندانی ساڵی ٥٨ لە شەڕی نێوشاری کامیاران بەفەرمی چەکیان بەدژی خەباتکارانی کورد هەڵگرت و لە ساڵی ٦١هەتاوی بەرەبەرە پەیوەست بوون بە هێزەکانی بەسیچ و ئێستاشی لەگەل بێ ئەو بەکرێگیراوانە بە مەبەستی جۆراجۆر کەڵکیان لێ وەردەگیردرێ.
لە پێوەندی لەگەڵ میلیتاریزەکردنی شاری مەهاباد و چەند شارێکی دیکە لە رۆژهەڵاتی کوردستان باس لەوەش دەکرێ کە کۆماری ئیسلامی لە هەوڵدایە لە ڕێگای ئەو مانۆڕە نیزامییەوە بەچاو ترساندنی خەڵکی رۆژهەڵاتی کوردستان و پاڵپشتی کردن لە حەشدی شەعبی گوشاری زیاتر بخاتە سەر هەرێمی کوردستان و خۆی ئامادە کردووە بۆ هاتنە ئارای هەرچەشنە ئەگەرێکی پێوەندی‌دار بە بارودۆخی باشووری کوردستان.
29/10/2017
