^{نووسەری گەورەی تورکیا و دۆستی کورد ئیسماعیل بێشکچی، لە وتارێکیدا زۆر بە توندی ڕەخنە لە بنەماڵەی تاڵەبانی دەگرێت و پێشیان دەڵێت ئێوە کەرکووکتان رادەستی دوژمن کرد.}

^{بێشکچی پێیان دەڵێت، عێڕاق ئەنفالی کردن، ھەڵەبجەی بەسەر ھێنان، بەڵام بەداخەوە بۆ بنەماڵەی تاڵەبانی کە لەگەڵ یەکپارچەیی خاکی عێراق دان و کەرکووکیشیان رادەست دەکەن.}

^{بێشکچی لە وتارێکیدا کە لە ماڵپەری (نارینا ئازاد) بڵاوی کردووەتەوە، نیگەرانیی دەربڕیوە لە ڕادەستکردنی کەرکووک بۆ دوژمن و دەڵێت: "حەشدی شەعبی دوژمنی کوردە، ھاتنی قاسم سولەیمانیش بۆ لای بنەماڵەی تاڵەبانی جیگای گومان بوو و بردنی جەلال تاڵەبانیش بۆ ئێران چەند مانگێک بەر لە ئێستا ھەر ئەو مەبەستەی لە پشت بووە".}

^{بێشکچی ھێرش دەکاتە سەر پاڤیڵ تاڵەبانی کوڕی گەورەی تاڵەبانی و دەڵێت ھەر ئەو ڕۆژەی کەرکووکی رادەستی حەشدی شەعبی کرد، پاڤێل گوتی من بەرگری لە نەوتی دزراوی کەرکووک ناکەم، ئەم چەمکەش (نەوتی دزراو) حکوومەتی عێڕاق بەرامبەر بە کورد بەکاری دەھێنێت.}

^{ئەو دەنووسێت: "تۆ چۆن دەبێت بەو شێوەیە باسی سامانی سروشتیی وڵاتی خۆت بکەیت، عێڕاق ھاتووە ناسنامەی تۆی داگیر کردووە، عێڕاق خاکی داگیر کردووی، لەوە راستتر بە زەبری ھێز پەلاماری داویت و ناسنامە و سامانی سروشتیی داگیر کردووە".}

^{بێشکچی لە بەشێکی تری وتارەکەیدا ئاماژە بەوە دەکات پاڤێل تاڵەبانی ئەوەندە دوژمنی وڵاتەکەی خۆی بێت و خزمەتی بێگانە بکات، کەواتە فێر کراوە، بۆیە دەبێت لەوروەوە لێکۆڵینەوە لە پەروەردەی پاڤێڵ تاڵەبانی بکرێت".}

^{ئیسماعیل بیشکچی نموونەی تەھا یاسین ڕەمەزان دەھێنێتەوە کە ئەویش کورد بووە، بەڵام لە سەردەمی سەدام حوسێندا ئەنفال بەسەر کورددا ھات و ھەڵەبجەیان بەسەردا ھات، ھەمووی ئەو ئەندازیاری بووە، ئیتر پێم بڵێن چ جیاوازییەک لە نێوان تەھا یاسین و پاڤێل تاڵەبانیدا ھەیە؟.}

29/10/2017