به‌گوێره‌ی ده‌زگاكانی راگه‌یاندنی ئێرانی و هه‌ندێك سه‌رچاوه له ناوخۆی رۆژهه‌ڵاتی كوردستان، كورد وه‌ك پێویست هه‌ڵبژاردنه‌كه‌ی بایكۆت نه‌كرد و زیاتر له نیوه‌ی ئه‌و كه‌سانه‌ی مافی ده‌نگدانیان هه‌بوو به‌شدارییان له هه‌ڵبژاردندا كرد. ئه‌وه له كاتێكدایه كه بۆ یه‌كه‌مین جاربوو سه‌رجه‌م حیزبه‌كانی رۆژهه‌ڵاتی كوردستان و ته‌نانه‌ت هێزه كوردیه‌كانی نێوخۆی ئێرانیش هه‌ڵبژاردنه‌كه‌یان بایكۆت كردبوو.
خالید ته‌وه‌كولی، پسپۆڕی كۆمه‌ڵناسی سیاسی و پاڵێوراوی خولی شه‌شه‌می مه‌جلیسی ئێران له‌وباره‌وه له لێدوانێكدا به ماڵپه‌ڕی (رووداو) ی راگه‌یاند: "به‌پێی ئاماره‌كان زیاتر له 50%ی خه‌ڵكی كوردستان به‌شداری له هه‌ڵبژاردنه‌كاندا كردووه. ئه‌و به‌شدارییه‌ش بۆ كۆمه‌ڵێك هۆكاری تایبه‌ت به نێوخۆی كوردستان و ئێران ده‌گه‌ڕێته‌وه كه سه‌ره‌كیترینیان كاریگه‌ری ئه‌و ته‌نگه‌ژه ئابووریه‌ی ئێرانه به‌سه‌ر ژیانی خه‌ڵكی كوردستانه‌وه ".
ناوبراو ئاماژه‌ی به‌وه‌شدا كه: " پێویسته داخوازییه‌كانی خه‌ڵك ئاستبه‌ندی بكه‌ین، ئه‌گه وه‌ك كوردێك بڕوانینه هه‌ڵبژاردنه‌كانی ئێران ئه‌وه شتێكی نامومكینه كه داخوازییه‌كانی ئێمه له‌و رێگه‌یه‌وه بێنه دی. له‌و هه‌ڵبژاردنه‌شدا هیچ پاڵێوراوێك دروشمی ئه‌وه‌ی نه‌دا كه كێشه‌ی كورد چاره‌سه‌ر ده‌كات و داخوازیه نه‌ته‌وه‌ییه‌كانی به گوێی ده‌سه‌ڵات ده‌گه‌یه‌نێت، به‌ڵكو سه‌رجه‌م دروشمه‌كانیان له چوارچێوه‌ی داخوازیه ماددی و ئابوورییه‌كانی خه‌ڵكدا خۆی ده‌دیته‌وه. خه‌ڵك ئاستی داخوازییه‌كانی خۆیان له‌و هه‌ڵبژاردنه‌دا زۆر هێنایه خوارێ و كه‌س باسی كوردایه‌تی و به فه‌رمی ناساندنی زمان و شوناسی كوردی نه‌ده‌كرد، له كاتێكدا له هه‌ڵبژاردنه‌كانی رابردوودا زۆر گرنگی به داخوازیه نه‌ته‌وه‌ییه‌كان ده‌درا و ته‌نانه‌ت باسیان له په‌یڕه‌وكردنی سیسته‌می فیدراڵی و فه‌رمیكردنی زمانی كوردی ده‌كرد ".
ته‌وه‌كولی سه‌باره‌ت به بڕیاری بایكۆتكردنی هه‌ڵبژاردن له لایه‌ن حیزبه كوردیه‌كانیشه‌وه، گوتی: "به بڕوای من پێویسته سیاسه‌تی حیزبه‌كانی رۆژهه‌ڵاتی كوردستان له هه‌مبه‌ر هه‌ڵبژاردن گۆرانكاری به‌سه‌ردابێت و به شێوه‌یه‌كی واقعبینانه و دروست بڕواننه داخوازییه‌كانی خه‌ڵكی كوردستان. داخوازییه‌كانی خه‌ڵك به هۆی گۆڕانی بارودۆخ، گۆڕانی به‌سه‌ردادێت و هه‌میشه وه‌ك خۆی نامێنێته‌وه. ئێستاكه گرنگترین شت بۆ خه‌ڵك باشتركردنی بارودۆخی ژیان و گۆڕینی باری ئابووریانه ".
ئه‌و هه‌روه‌ها ره‌خنه‌ی له حیزبه‌كانی رۆژهه‌ڵاتی كوردستان گرت و گوتی: "هه‌ڵوێستی حیزبه‌كانی كوردستان سه‌باره‌ت به‌و كه‌سانه‌ی كه به‌شداری له هه‌ڵبژاردنه‌كاندا ده‌كه‌ن، نیشانه‌ی ده‌ركنه‌كردنی ژیانی ناوخۆی كوردستانه. ئه‌وان به‌بێ ره‌چاوكردنی چۆنیه‌تی ژیان له ناوخۆی كوردستان، به‌شداربووانی هه‌ڵبژاردنه‌كان به جاش و خۆفرۆش ناو ده‌به‌ن، ئه‌و درووشمانه چه‌ندین ساڵه به‌كارده‌بردرێن و ئێستاكه كاریگه‌رییه‌كی ئه‌وتۆیان له‌ناو خه‌ڵكدا نه‌ماوه ".
ته‌وه‌كولی سه‌باره‌ت به به‌كارهێنانی پاره و نان بۆ كڕینه‌وه‌ی ده‌نگی خه‌ڵك ده‌ڵێت: "كه‌س ناتوانێت نكۆڵی له‌وه بكات كه پاڵێوراوان پاره‌یه‌كی یه‌كجار زۆریان بۆ پروپاگه‌نده‌ی هه‌ڵبژاردن ته‌رخان كرد و به پێدانی ژه‌مه نان و پاره هه‌وڵی كڕینه‌وه‌ی ده‌نگی خه‌ڵكیان دا ".
هه‌روه‌ها ئاماژه‌ی به ورووژاندنی هه‌ستی خه‌ڵك له‌لایه‌ن ده‌سه‌ڵاته‌وه كرد و گوتی: "ئێران به‌جۆرێك هه‌ڵبژاردنه‌كان داده‌ڕێژێت كه سه‌ره‌ڕای نه‌بوونی كه‌شێكی ئازاد و دیموكراتیانه، به جۆرێك ململانێ له نێوان پاڵێوراوان پێكبێت له‌و رێگه‌یه‌وه سه‌رنجی خه‌ڵك به‌ره‌و هه‌ڵبژاردن رابكێشێت. بۆ نموونه دروستكردنی ململانێ له‌نێوان شاره‌كانی بانه و سه‌قز كه به‌یه‌كه‌وه یه‌ك نوێنه‌ری هاوبه‌شیان له مه‌جلیسی ئێران هه‌یه به جۆرێك كه هه‌ر شاره هه‌وڵ بدات پاڵێوراوی شاره‌كه‌ی خۆی بۆ نوێنه‌رایه‌تی هاوبه‌ش هه‌ڵبژێردرێت یان كه‌ڵكوه‌رگرتن له ده‌نگۆی ده‌ستبه‌سه‌ركردنی نوێنه‌ری مه‌هاباد بۆ ورووژاندنی هه‌ستی خه‌ڵك‌و ... هتد ".
سه رچاوه: رووداو
