ژینگەپارێزانی خۆبەخش بە دڵی خۆش دارستانەکانی مەریوانیان جێهێشت؛ ئەوان دوای سێ رۆژ شەونخونی بەسەر ئاگری دارستانەکاندا سەرکەوتن، هەڵبەت بە زیانێکی زۆری ژینگەییەوە.
لەم دوو هەفتەیەدا سەتان هێکتار دارستان و لەوەڕگەی مەریوان سووتاون. سووتانێک کە ئەنجامی کەمتەرخەمی یان دەستی ئەنقەستی کەسانێکە کە بۆ بەرژەوەندییەکی کەم، زیانی گەورە بە ژینگە دەگەیێنن و گیانی ژینگەپارێزانی خۆبەخشیش دەخەنە مەترسییەوە.
لە کۆنترۆڵکردنی ئاگری دارستانەکانی مەریواندا خەڵکێکی زۆر بەشداربوون. دانیشتووانی گوندەکانیش بە رێنوێنیی ئەندامانی ئەنجوومەنی سەوزی چیا رۆڵی کاریگەریان بینی.
تاوەکو ئێستا رێژەی زەرەر و زیانی ئاگرکەوتنەوەی سێ رۆژی رابردووی دارستان و لەوەڕگەکانی مەریوان رانەگەیێندراوە، بەڵام بەپێی بەراوردی سەرەتایی زیاتر لە 500 هێکتارە.
ئاگرگرتنی دارستان تەنیا زیان بە دار و لەوەڕگە ناگەیێنێت، گیانی باڵندە و بوونەوەرەکانیش دەخاتە مەترسییەوە. لە ئاگرکەوتنەوەی ئەمجاری دارستانەکانی مەریواندا، ئەو کیسەڵە لەلایەن ژینگەپارێزانەوە رزگار کرا، بەڵام زۆر بوونەوەری دیکە تێداچوون.
٨/٨/٢٠٢٣
