^{دوای بڵاوبوونەوەی ڕاپۆرتە پشتڕاستنەکراوەکان سەبارەت بە دانوستانەکانی ئێران و ئەمەریکا بۆ زیندووکردنەوەی ڕێککەوتنە ناوکییەکەی ساڵی 2015، ئەندامێکی پەرلەمانی ئێران دانوستانە نافەرمیەکانی نێوان تاران و واشنتنی لە نیویۆرک پشتڕاست کردەوە.}

^{پێشتر ڕۆژنامەکانی ئیسرائیل بە پشتبەستن بە لێدوانی بەرپرسانی بەرگری وڵاتەکە بڵاویانکردەوە کە ئێران و ئەمەریکا "زۆر نزیکن" لە ڕێککەوتنێک سەبارەت بە بوژانەوەی ڕێککەوتنە ناوکییەکەی نێوان ئێران و زەلهێزە جیهانییەکان.}

^{هەروەها ماڵپەڕی میدڵ ئیست ئای چەند ڕۆژ پێش ئێستا لە زاری دوو سەرچاوەی نەناسراوەوە بڵاویکردەوە کە ئەمەریکا "نزیک بۆتەوە لە واژۆکردنی ڕێککەوتنێکی کاتی کە تیایدا واشنتن هەندێک لە سزاکان لادەبات و لە بەرامبەریشدا ئێران چالاکییەکانی وەک پیتاندنی یۆرانیۆم کەم دەکاتەوە."}

^{لە ڕاپۆرتەکەدا ئاماژە بەوە کرابوو کە ئێران پیتاندنی یۆرانیۆم کەم دەکاتەوە و بەردەوام دەبێت لە هاریکاریکردن لەگەڵ دەزگای وزەی ئەتۆمی نەتەوە یەکگرتووەکاندا، ئەمەش لە بەرامبەر ڕێگەدان بە هەناردەکردنی 1 ملیۆن بەرمیل نەوتی ئێران لە ڕۆژێکدا و دەستڕاگەیشتنی ئەو وڵاتە بە سەرمایە سڕکراوەکانی لە دەرەوە.}

^{کۆشکی سپی ڕاپۆرتەکەی ڕەت کردەوە و گوتەبێژی ئەنجومەنی ئاسایشی نیشتیمانی کۆشکی سپی وەکو ئاماژەیەک بۆ ڕاپۆرتەکەی ماڵپەڕی میدڵ ئیست ئای گوتی "ڕاپۆرتەکە هەڵەیە و چەواشەکارییە و هەر ڕاپۆرتێک لەسەر ڕێککەوتنی کاتی هەبێت ڕاست نیە."}

^{بەڵام ڕۆژی شەممە،10ی مانگی شەش موجتەبا تەوانگەر، پەرلەمانتاری ئێران دانوستانە نهێنییەکانی نێوان ئێران و ئەمەریکای لە نیویۆرک پشتڕاست کردەوە و لە تویتێکدا نووسیوێتی "سەرەڕای ئەنجامدانی دانوستانەکان لە نیویۆرک، بەڵام بە هۆی داواکارییە زۆرەکانی ئەمەریکا، هیچ ڕێککەوتنێک بەمزووانە لە ئارادا نییە."}

^{ئەو ئەندام پەرلەمانە هەروەها نووسیوێتی "حکومەتی ئەمەریکا هەوڵ دەدات ئێران بە شێوەی راستەوخۆ بهێنێتە ناو دانوستانەکان."}

^{ناوبراو ئەمەریکا تۆمەتبار دەکات بەوەی کە هەوڵ دەدات "لە بەرامبەر ئازادکردنی سەروەت و سامانی سڕکراوی ئێران، وڵاتەکە لە هێزی ئەتۆمی داماڵێنێت" و نووسیویەتی ئەم کارە "دژی یاسا و پێچەوانەی بەرژەوەندییەکانی ئێرانە".}

^{شایانی باسە کە ڕۆژنامەی فاینەنشاڵ تایمزی بەریتانیاش هەفتەیەک پێش ئێستا لە زاری چەند دیپلۆماتکار و شرۆڤەکارەوە بڵاویکردەوە کە ڕابێرت ماڵی نێردەی ویلایەتە یەکگرتووەکانی ئەمەریکا بۆ کاروباری ئێران چەند جارێک لەگەڵ ئەمیر سەعید ئیروانی، نێردەی و نوێنەری هەمیشەیی کۆماری ئیسلامی لە بارەگای نەتەوە یەکگرتووەکان لە نیویۆرک کۆبووەتەوە و قسەیان کردووە.}

^{ڕاپۆرتەکەی فاینەنشاڵ تایمز لە زاری سەرچاوەیەکی نزیک لە بەڕێوبەرایەتی جۆو بایدن نووسیوبووی کە ئەو وتووێژانە بە شێوەیەکی سەرەکی لەسەر ئەگەری ئاڵوگۆڕی زیندانییەکان لەگەڵ کۆماری ئیسلامی بووە.}

12/6/2023