^{عەلی ئەكبەر ئەحمەدیان، سكرتێری ئەنجومەنی باڵای ئاسایشی ئێران، ئەمڕۆ دوشەممە، لەمیانی پێشوازیكردنی لە قاسم ئەعرەجی، راوێژكاری ئاسایشی نیشتمانیی عێراق و شاندی یاوەریدا رایگەیاند، لەچوارچێوەی رێككەوتنی ئەمنی نێوانماندا، چاوەڕێین هەرچی زوە عێراق كۆتایی بە گروپە ئۆپۆزسیۆنەكانی ئێران لەسەر خاكەكەی بهێنێت.}

^{ئاوێنە: قاسم ئەعرەجی، راوێژكاری ئاسایشی نیشتمانیی عێراق لەگەڵ شاندێكی یاوەری بەسەردانێك لە ئێرانەو ئەمڕۆ دوشەممە، لەلایەن عەلی ئەكبەر ئەحمەدیان، سكرتێری ئەنجومەنی باڵای ئاسایشی ئێرانەوە پێشوازی لێكرا.}

^{بەپێی میدیای رەسمی ئێران لە دیدارەكەدا، عەلی ئەكبەر ئەحمەدیان وتویەتی، رێككەوتنە ئەمنییەكەی ئەم دواییەی نێوان ئێران و عێراق، بەرهەمی چەندین مانگ گفتوگۆو هەوڵی هاوبەشی دەزگا پەیوەندیدارەكانی هەردو وڵاتەو نەخشەڕێگەیەكە بۆ دروستكردنی ئاسایشێكی تۆكمە لە سنورەكان و زەمینەسازیشە بۆ پەرەپێدانی هاریكاری نێوان هەردو وڵات لە بوارەكانی دیكەدا.}

^{ئەحمەدیان هاوكات رێككەوتنەكەی بە "هەنگاوێكی زۆر گونجاو و ستراتیژی" ناوبردو جەختیشی لەسەر جێبەجێكردنی ناوەڕۆكی رێككەوتنەكە كردەوە.}

^{سكرتێری ئەنجومەنی باڵای ئاسایشی ئێران وتوشیەتی"چاوەڕێین حكومەتی عێراق لەچوارچێوەی ئەم رێككەوتنەدا، هەرچی زوترە بە كۆتاییهێنان بە چەكدارانی گروپە ئۆپۆزسیۆنەكان لەو وڵاتە، ئاسایشی سنورەكانی عێراق لەگەڵ ئێران زامن بكات."}

^{بەگوێرەی میدیای رەسمی ئێران لە دیدارەكەدا، قاسم ئەعرەجی جەختی كردۆتەوە كە "ئاسایشی عێراق ئاسایشی ئێرانەو ئاسایشی ئێرانیش ئاسایشی عێراقە."}

^{هەروەها ئەعرەجی جەختیشی كردۆتەوە كە عێراق پابەند دەبێت بەو رێككەوتنە ئەمنییەی بەم دواییانە لەنێوان هەردو وڵات ئیمزاكراوە.}

٢٩/٥/٢٠٢٣