لە زانکۆی ورمێ 50 خوێندکار بەهۆی خۆپێشاندانەکانەوە لە خوێندن بێبەشکراون و رێگەیان پێنادرێت بگەڕێنەوە زانکۆ. هاوکات 50 هاونیشتمانی خەڵکی پیرانشاریش لە زیندانی شاری نەغەدەدا راگیراون و چارەنووسیان نادیارە.
رۆژنامەی شەرق لە زاری سەرچاوەیەکی ئاگادارەوە بڵاوی کردووەتەوە، بەگشتی 50 خوێندکاری زانکۆی ورمێ رێگەیان پێنادرێت بگەڕێنەوە زانکۆ و بەرپرسانی زانکۆکەش بەدواداچوونێکی ئەوتۆیان بۆ کێشەی ئەو قوتابییانە نەکردووە، تەنیا تەلەفۆنیان بۆ چەند کەسیان کردووە و پێیانگوتراوە نووسراوێک بۆ بەرگری لە خۆیان بنووسن.
دوو هەفتە دوای گیانلەدەستدانی ژینا ئەمینی، وەک زۆر لە زانکۆکانی دیکە، لە زانکۆی ورمێش خۆپێشاندان کرا، بەڵام زانکۆ و تەنانەت دامەزراوە ئەمنییەکانیش هەڕەشەیان لە خوێندکارەکان کرد. پەیوەندییان بە هەندێ لە خوێندکارەکان و کەسوکاریان کردبوو کە نابێت بەشداریی لە ناڕەزایەتیدا بکەن.
بەڵام نزیکەی 4 هەفتە دواتر دیسان لەو زانکۆیەدا خۆپێشاندان کرا و زانکۆ هەڵسوکەوتی تووندی لەگەڵ خوێندکارە ناڕازییەکاندا کرد. بەشی ئەمنیی زانکۆ دەستی بە بانگکردن و سزادانی خوێندکارە خۆپێشاندەرەکان کرد. دواتر خوێندکارەکان بۆ پشتیوانی لە خوێندکارە بانگکراوەکان، خۆپێشاندانیان کرد.
ئاژانسی هەواڵی کوردپاش بڵاوی کردووەتەوە، 50 هاونیشتمانی دەستگیراوی خەڵکی پیرانشار، لە زیندانی نەغەدەدا راگیراون و بارودۆخیان ناڕوونە.
بەپێی ئەو هەواڵە، داواکاری پیرانشار و ئیدارەی ئیتلاعاتی پیرانشار، دژی ئازادکردنی ئەو کەسانەی بە دانانی بارمتەش، بوون. ئەوان لە ناڕەزایەتییەکانی ئەمدواییانەی پیرانشاردا دەستبەسەر کراون.
٥/١/٢٠٢٣
