خۆپێشاندان لە ئێران و رۆژهەڵاتی کوردستان بەردەوامە. شەوی رابردوو لە شەقامی پێنجی ئازەر لە ئیسفەهان خۆپێشاندەران دروشمی داکۆکی لە مافی ژنانیان گوتەوە. هەروەها خۆپێشاندەران لە تارانیش دروشم دا گوتیان، "ئەگەر تاران ببێتە کوردستان، ئێران دەبێتە گوڵستان" و داواشیان لە خەڵك کرد بچنە سەر شەقام.
لە سەتارخانی تارانیش خۆپێشاندەران داوا دەکەن خەڵک پشتیوانییان بکات. هەروەها لە شاری رەشت لە باکووری ئێرانیش خۆپێشاندەران پشتیوانییان لە رۆژهەڵاتی کوردستان کرد و لەسەر لافیتەیەک نووسییان "بژی ئازادی، بژی کوردستان."
خەڵک چیدیکە سەبری نەماوە. لە میانی سەردانی رۆژی پێنجشەممەی سەرۆککۆماری ئێران بۆ ئیسلام شاری تاران، لە گوتاری ئیبراهیم رەئیسیدا بۆ خەڵک، یەکێک لە بەشداربووانی کۆبوونەوەکە هاواری کرد و گوتی، "لە کۆڵمان ببنەوە."
ئەو هاووڵاتییە هەروەها بە سەرۆککۆماری ئێرانی گوت، "واز بێنن. واز بێنن لە بیروباوەڕی دواکەوتووانە. واز بێنن لەوەی کاری ئەمڕۆ بخەنە سبەی. واز بێنن لە گەندەڵی و هەڵە... وازبێنن."
بەڵام سەرۆککۆماری ئێران قسەکانی پێ بڕی و دواتر خەڵک چەپڵەیان بۆ رەخنەگرەکە لێدا، بەڵام سەرۆککۆماری ئێرانیش قەوانە کۆنەکەی خۆ دەکوتێ و پێداگری لەسەر رێبازی رێبەری پێشووی کۆماری ئیسلامی دەکاتەوە.
لە قۆناخێکدا کە حکومەتی ئایینیی ئێران بە رێبەریی مامۆستایانی ئایینی لە قۆناخێکی هەستیاری مێژوویی دایە، مامۆستایانی ئایینی کورد پۆل پۆل پشتگیری خۆیان بۆ خۆپێشاندەرەکان دەردەبڕن. ناڕەزایەتییەک کە لە مەرگی ژینا ئەمینی لە گرتنگەی پۆلیسی رەوشتی تارانەوە دەستیپێکرد و 11 هەفتەیە بەردەوامە.
مامۆستایەک بە ناوی مامۆستا ئایینییەکانی سەردەشت و رەبەت راگەیێندراوێکی خوێندەوە و گوتی، "ناڕەزایەتییەکانی ئەم دواییەی کوردستان، هەر وەک شوێنەکانی دیکەی ئێران، بەرهەمی چەندین دەیە ستەم و نادادپەروەری، سەروەرنەبوونی یاسا و دابەشکردنی هاونیشتمانییەکان بەپێی گرووپ و پلەی جیاوازە. هەروەها نمایشی ترساندن و تۆقاندنی لە شارەکانی کوردستان لەڕێی نمایشی ئۆتۆمبیلە سەربازییەکان، هێرش بۆ ماڵ و ئۆتۆمبیلی خەڵک بە تووندی سەرکۆنە دەکەین."
ئەو مامۆستایانە داوایان کرد دەسەڵات دان بە خواستی خەڵکدا بنێت و پشتیوانییان بۆ داواکاری مەولەوی عەبدولحەمید، کەسایەتیی ئایینیی بەلوچیان دەربڕی. ئەو داوای ریفراندۆمی بۆ ئێران کردووە.
٣٠/١١/٢٠٢٢
