(2).jpeg)
بەشێک لەو کەسانەی لە زیاتر لە یەک مانگی رابردوودا لە رۆژهەڵاتی کوردستان لەلایەن هێزە ئەمنییەکانی ئێرانەوە بە تۆمەتی بەشداریکردن لە خۆپێشاندان و هاندانی خەڵک بۆ ناڕەزایی دەربڕین دەستبەسەرکراون، بە دانانی بارمتە و تاوەکو کاتی دادگاییکردنیان ئازادکراون، بەڵام چارەنووسی ژمارەیەکی دیکەیان نادیارە و کەسوکاریان دەڵێن، زانیارییان لەبارەی دۆخی تەندروستی و شوێنی راگرتنیان پێنادرێت.
یەکێک لەو دەستبەسەرکراوانە هاونیشتمانییەکی مەریوانییە بە ناوی جەلیل ئەحمەدی تەمەن 46 ساڵان. مەنسور ئەحمەدی، برای جەلیل ئەحمەدی ئەمڕۆ هەینی 21-10-2022 بە تۆڕی میدیایی رووداوی راگەیاند، براکەی 21 رۆژ پێش ئێستا لە دووکانەکەی خۆی لەلایەن ئیتڵاعاتی مەریوانەوە دەستگیرکرا و تاوەکو ئێستا رێگەی پێنەدراوە پەیوەندیی بە کەسوکارییەوە بکات و هێزەکانی ئیتڵاعاتیش ئامادەنین هیچ زانیارییەکیان پێبدەن.
مەنسوور ئەحمەدی دەشڵێت، یەکێک لەو کەسانەی لە گرتووخانەی ئیتڵاعاتی مەریوان لەگەڵ براکەی بووە، پێی راگەیاندوون کە جەلیل ئەحمەدی ئەشکەنجە دراوە و چوار جار پزیشک چووەتە گرتووخانەی ئیتڵاعات بۆ چارەسەرکردنی.
دامودەزگا حکومییەکان، پۆلیس و دەزگای دادی ئێران ئاماری دەستبەسەرکراوانی خۆپێشاندانەکان بڵاوناکەنەوە، بەڵام چالاکڤانانی مافی مرۆڤ لە ئێران دەڵێن، مەزندە دەکرێت زیاتر لە پێنج هەزار و 500 کەس دەستبەسەرکرابن. تۆڕی مافی مرۆڤی کوردستانیش دەڵێت، لە پارێزگاکانی سنە، ورمێ، کرماشان و ئیلام زیاتر لە دوو هەزار کەس دەستبەسەرکراون.
٢٥/١٠/٢٠٢٢
