^{ناسر كەنعانی وتەبێژی وەزارەتی دەرەوەی ئێران داوا دەكات، حكومەتی عیراق سەرجەم سنورەكانی هەرێمی كوردستان لەگەڵ ئێران كۆنترۆڵ بكات.
بەبۆنەی دەستبەكاربوونی سەرۆك كۆماری نوێی عیراق، ناسر كەنعانی لە وتەیەكدا رایگەیاندووە، خۆشحاڵن بە هەڵبژاردنی سەرۆككۆماری عیراق، چاوەرێ دەكەن حكومەتی بەغدا سەرجەم سنورەكانی هەرێمی كوردستان لەگەڵ ئێران كۆنترۆڵ بكات.
وتەبێژەكەی وەزارەتی دەرەوەی ئێران هێمای بۆ ئەوەش كردووە، پێویستە هێزەكانی عیراق لەسەر سنور رێگە لە هاتوچۆی "وەك خۆی دەڵێت" گروپە تیرۆریستییەكان بگرن.
لەماوەی رابردودا ئێران بۆردومانەكانی لە رێگەی درۆنی بۆمبڕێژكراو و موشەكەوە بۆ سەر پێگە و بارەگای حزبە كوردیەكانی رۆژهەڵاتی كوردستان لەناو خاكی هەرێم چڕ كردەوە و بەهۆیەوە ژمارەیەك كەس بوونە قوربانی، ئەوەش كاردانەوەی ناوخۆیی و جیهانی زۆری بەدوای خۆیدا هێنا.}

17/10/2022