^{هێزەکانی سوریای دیموکراتیک کە لەلایەن ئەمەریکاوە پشتیوانییان لێدەکرێت دەڵێن لەگەڵ هێزەکانی حکومەتی سوریادا هەماهەنگی دەکەن بۆ بەرپەرچدانەوەی هەر داگیرکارییەکی تورکیا لە باکوورەوە و پاراستنی خاکی سوریا.}

^{هەسەدە دەڵێت بڕیارەکەی دوای کۆبوونەوەیەکی بەپەلە بووە لەنێوان فەرماندە باڵاکانی هێزەکاندا و تیایدا تاوتوێی هەڕەشەکانی تورکیایان کردووە بۆ ئەنجامدانی هێرشێکی نوێ لەو ناوچانەی باکووری سوریا کە لەژێر کۆنتڕۆڵی هێزەکان خۆیاندان.}

^{هاوکات هێزەکانی ڕووسیا و حکومەتی سوریا لە باکووری سوریا پتەوبوون کە بەرپرسانی تورکیا و ئۆپۆزسیۆنی سوریا دەڵێن لەوێ تورکیا ڕەنگە بەمزووانە هێرشێکی نوێ دژی هێزە کوردییەکان ئەنجام بدات، لەکاتێکدا تورکیا ئامادەکاری دەکات بۆ گفتوگۆکردن لەگەڵ ڕووسیادا.}

^{دوو هەفتە لەمەوبەر سەرۆکی تورکیا ڕەجەب تەیب ئەردۆغان ڕایگەیاند تورکیا ئۆپەراسیۆنی سەربازیی نوێ لە سوریا ئەنجام دەدات تاوەکو " ناوچەیەکی پارێزراو " بەدرێژایی سنووری نێوان تورکیا و سوریا بە قووڵی 30 کم دابمەزرێنێت، ئامانجی ئۆپەراسیۆنەکانیش ناوچەکانی تەل ڕەفعەت و مەنبج و ناوچەکانی دیکەی بەرەو ڕۆژهەڵات دەبێت.}

^{ڕووسیا کە لە ماوەی ڕابردوودا هۆشداریدا دژی زیادبوونی هەر گرژییەکی سەربازیی لە باکووری سوریا، ڕۆژی چوارشەممە وەزیری دەرەوەی وڵاتەکە سێرگێی لاڤرۆڤ دەنێرێت بۆ ئەنقەرە و لەگەڵ هاوتا تورکییەکەیدا کۆدەبێتەوە.}

^{هەر هێرشێکی تورکیا لە باکووری سوریا ئامانجەکەی ڕەنگە یەکینەکانی پاراستنی گەلی کورد ' یەپەگە ' بێت کە بەشێکی سەرەکییە لە هێزەکانی سوریای دیموکراتدا، هێزەکانی سوریای دیموکرات بەشێکی گەورەی باکووری سوریایان لەژێر دەستدایە و ئەمەریکاش بە هاوپەیمانێکی گرنگییان ناودەبات دژی ڕێکخراوی داعش.}

^{وتەبێژێکی سوپای نیشتیمانی سوریا کە هێزێکی ئۆپۆزسیۆنە و لەلایەن تورکیاوە پشتیوانییان لێدەکرێت، وتی ڕووسیا شوێنەکانی لە نزیک تەل ڕەفعەت و مەنبج و باشووری قەراغ شاری کۆبانی و عەین عیسا پتەوتر کردووە، سەرجەم ئەو ناوچانەش 40 کیلۆمەتر لە سنووری تورکیاوە دوورن.}

^{وتەبێژی سوپای نیشتیمانی سوریا ڕائید یوسف حەمود بە ڕۆیتەرزی وت " لە ڕاگەیاندنی ئۆپەراسیۆنەکەوە، ڕژێمی سوریا و میلیشیا ئێرانییەکان هێزی پشتیوانی بۆ یەپەگە دەنێرن."}

^{وتیشی هەواڵگرییەکەیان کۆپتەری ڕووسی بینیوە کە لە بنکەیەکی ئاسمانی نزیک تەل ڕەفعەت نیشتوونەتەوە.}

^{لەلای خۆیەوە سەرکردەی هێزەکانی سوریای دیموکرات مەزڵوم کۆبانی ڕۆژی یەکشەممە بە ڕۆیتەرزی وت حکومەتی سوریا دەبێت سیستمەکانی بەرگری ئاسمانی بەکاربهێنێت دژی فڕۆکەکانی تورکیا و هێزەکانیان " کراوەن " بەڕووی کارکردندا لەگەڵ هێزەکانی سوریادا تاوەکو بەرپەرچی تورکیا بدەنەوە، بەڵام وتی پێویست ناکات هێزی زیاتر بنێرن.}

^{سەرچاوە/ دەنگی ئەمەریکا}

٨/٦/٢٠٢٢