(2).jpeg)
11 رۆژ دوای داڕمانی باڵەخانە 10 نهۆمییەکەی ئابادان، وەزیری ناوخۆی ئێران کۆتاییهاتنی دەرهێنانەوەی تەرمی قوربانییەکانی راگەیاند، پێش ئەوەی تەواو دڵنیاببنەوە کەسی تێدا نەماوە.
ئەحمەد وەحیدی، وەزیری ناوخۆی ئێران دەڵێت، "هەندێک کەس دەڵێن، هەموو تەرمەکان دەرنەهێنراونەتەوە، تیمەکانی فریاکەوتن بەردەوام دەبن لە هەڵدانەوەی داروپەردوی باڵەخانە رووخاوەکە."
رەنگە هۆکارێکی راگەیاندنی تەواوبوونی دەرهێنانەوەی قوربانییان پەیوەندی بەو سەردانەوە هەبێ. ئیبراهیم رەئیسی رۆژی هەینی گەیشتە ئابادان و سەردانی شوێنی رووداوەکە و ماڵی بەشێک لە قوربانییانی کرد.
تاوەکو ئێستا تەرمی 37 کەس لەژێر باڵەخانەی میترۆپۆلی ئابادان دەرهێنراوەتەوە. دوو کەسیان نەناسراونەتەوە و تەرمی 35 کەسەکەی دیکە بەخاک سپێردراوە. یەکێک لەوانەی گیانی لەدەستداوە، کوڕێکی تەمەنی 27 ساڵە و خوێندکاری دکتۆرا بوو.
یەدوڵڵا نیکپوور، باوکی یەکێک لە قوربانییەکانی داڕمانی باڵەخانەکەی ئابادانە و گوتی، "یەکێک ئەنجوومەنی شارە کە لەو چەند خولەدا هیچ پەیوەندییەکی بە شارەوە نەبووە، یەکی دیکەش پەرلەمانتارەکانن و ئەوانیش هیچ پەیوەندییان بە شارەوە نییە. تەنانەت بەهۆی دەستێوەردانەکانیان، شارەکەمان لەنێو چووە. تەواوی بەرپرسان لەلایەن ئەوانەوە دەستنیشان دەکرێن. ئەگەر بابەتە هەر بێننەوە نێو دەزگەی داد و سێ کەس لەسێدارە بدەن، من ناڵێم لەسێدارەیان مەدەن، دەبێ ئەوە بکەن، بەڵام ئەگەر تەنیا بەوە سنوورداری بکەن، پێنج ساڵی دیکەش دۆخەکە هەر ئەوەیە."
سەرۆککۆماری ئێران لە سەردانی ماڵی قوربانییاندا گوتی، سزای تووندی هەموو ئەو کەسانە دەدەن، بەرپرسن لە رووداوەکەدا.
بەڕێوەبەری دادی خوزستان دەڵێت، لەسەر ئەو رووداوە 13 کەس دەستبەسەرکراون. سەرۆکی ئێستا و سێ سەرۆکی پێشووی شارەوانی ئابادان، سەرۆکی پێشووی رێکخراوی ئەندازیارانی شارەکە و ئەندازیار و چاودێری پڕۆژەکە لەنێو دەستبەسەرکراواندان.
لیژنەیەکی حەوت کەسیش پێکهێنراوە بۆ لێکۆڵینەوە لەسەر هۆکاری داڕمانی باڵەخانەکە و ناساندنی ئەو کەسانەی پەیوەندییان بە بابەتەکەوە هەیە.
3/6/2022
