^{٦ کتێبۍٚ هەورامیۍٚ جۆراوجۆرۍٚ ڕەوانۍٚ چاپی و بازاری کریۍٚ کە یۆشان تایبەتەنە بە بەرهەمۍٚ ٢٣ێ جە ژەنە نۋیسەرۍٚ و هۆنیەرەکۍٚ هەورامانی.}

^{جەهەورامانو دیمو وەرکەوتو کوردستانی کۆشای فەرەهەنگی و چاپەمەی بە زۋانی هەورامی بەردەوامەن و گەشە مسانۆن و دەستگاو چاپ و پەخشو زایەڵەی چەنڎین کتێبۍٚ تەرێش ڕەوانۍٚ چاپی و بازاری کەردێ.
جە ئی چوارچوەنە دەستگاکە ٦ کتێبۍٚ هەورامیۍٚ کە ڤیارە جیا جیاکان جەوێشان مگێرانۍٚ ڕەوانۍٚ چاپی و بازاری کریۍٚ و یۆشان تایبەتەنە بە بەرهەمۍٚ ٢٣ێ جە ژەنە نۋیسەرۍٚ و هۆنیەرەکۍٚ هەورامانین بەنامۍٚ (خاتوونۍٚ قه‌ڵه‌م ڕه‌نگینۍٚ هەورامانی).
بە پاو زانیاری بەدەستوزیای جە هەورامانەوە کتێبەکۍٚ بە ئی جۆرەنۍٚ:}

^{کتێبوو خاتوونێ_قه‌ڵه‌م_ره‌نگینێ #هه‌ورامانی بەرهەمو قه‌ڵه‌مو ٢٣ جە ژەنە قەڵەمبەدەستەکانو هه‌ورامانیا که‌ به‌ زه‌حمه‌توو نویسه‌ری وه‌شنام و خامه‌ ڕه‌نگین ڕه‌حیم_ره‌حمانی گلێرکریانه‌وه‌ و به‌ پاڵپه‌شتی ماڵی سنۆقوو وارانی چاپ کریۆ . ئی کتێبه‌ جه‌ لاو ئێنتشاراتوو زایڵه‌ی دماو موجه‌وێزی لوان په‌ی چاپخانه‌ی و ئه‌چی ڕوانه‌ چاپ بۆ و مه‌ی دلێ بازاروو کتێبی. سپاس په‌ی گردوو خاتوونه‌ به‌شداره‌کا، سپاس په‌ی نویسه‌ری ئازیز کاکه‌ ره‌حیم ره‌حمانی و سپاس په‌ی تماموو شمه‌ که‌ پاڵپه‌شتی که‌ردێ جه‌ سنۆقوو وارانی..}

^{نامێو بەرهەمی: وانەی هەورامی(تایبەت بە ئەدەبیاتی بوومی)
نویسەرێ: شووراو نویسەرا
چاپوو ئەوەڵی: نەورۆزو ١٤٠١
چاپ و پەخش: زایەڵە}

^{ئی بەرهەمە تایبەتا بە وانەو مسیاراو وانگایەکاو بەشو ئەدەبیاتی بوومی. بەرهەمەکە به قەڵەموو چندٚ نویسەرا و بە شێوەی ئاکادمیک ئامادە کریان.}

^{نامێو بەرهەمی: یاوای بە گوڵی (سۆرانی، هەورامی)
بابەت: شێعرێ
شاعێر: حاجی عەدنان سەمەدی
چاپوو ئەوەڵی: نەورۆزوو 1401
چاپ وپەخش: زایەڵە
ئی بەرهەمە بەشێوە جە شێعرە وەسفی و بابەتیانەکاو شاعێریش گێرتێنێ وێ. شێعرەکێ جە دوێ بەشا؛ بەشی سۆرانی و بەشی هەورامی کۆماشا گێرتەن.}

^{نامێو کتێبی: گۆچانە
بابەت: ئەرمان‌نامە (نمایش‌نامە)
نویسەر: ڕەئووف مەحموودپوور
چاپ و پەخش: زایەڵە/ زمسانوو 1400
ئی بەرهەمە دوێ ئەرمان‌نامێش گێرتێنێ دامان. ئەرمان‌نامەو «گۆچان»ێ و ئەرمان‌نامەو «ڕەمای تا بەرەو دانشگای».
گۆچانە دەقێوی ئاوردیانە و خەلاقا. بە زوانێوی تا ڕادێوە تەنزاوی نویسیان. ئەرمان‌نامێوی دەگایانەن. باسوو کوڕێوە بێ‌دەنگی و وێ لاگیری کەرۆ هەکە شێوازێوی جیاوازش پەی چەمنای گۆچانا ئاوردەنەنە و بە پێچەوانەو نەریتی ویەرینی خەریکوو ئاوردەیەنە و جیاوازکاریەن. ئی کوڕە و گۆچانەکاش کەوتێنێ سەروو زوانوو خەڵکی و بیێنێ باعیس بەشێوە فرە جە خەڵکوو دەگای گنا وات‌وویت و هەریۆ بە جۆریێ و جە وینگایێوێ کەسی و مەرامیانەوە باسوو ئا هەرمانێ بکەرۆ و بە دڵوو وێش لەیەکش بدٚۆوه. هەرکەس پەی ئا کاری ناتۆرەی جیاواز تاشۆ و وزۆش وەروو پەلامارێ. بەڵام گۆچانەکێ جم‌وجووڵێوی تایبەتشا وستەن دلێو خەڵکوو دەگاکێ و بیێنێ سەرچەمەو باس و بابەتی. ...
بەشێوە کوڵ جە دەقەکەی:
« ... باس باسوو گۆچانەکێ "ژیولە"یا. هەر یۆ بە جۆریێ باسش کەرۆ. سەرچەمەو گردوو باسەکایچ پەی دەنگدایشۆ جە ئێنترنتەنە مگێڵۆوە. قاوەخانەکەو "حوزە زوانە"یچەنە پیر و جوان گووشیێوەشا گرتەن دەسەوە و سەرشەوە متەشا مێ. جارجاریچ نووکە گلکێوەش پۆرە ساوا، عەین ئەجۆ هەشپشی کوشا.
"قێخا فەڵەدٚە" قاوەخانەکەنە مێ بەر. چەمش گنۆ "خاڵە فیلمچی" وەختاریێ دووربینەکەش گرتەن خەڵکەکەی و خەریکوو زەفت کەردەیەن.
دەسیێ وزۆ سەروو چەماش و عال وردوو خاڵەی و دووربینەکەیش بۆوە. چندٚ هەنگامێ ملۆ وەرۆ.
ماچۆ: ها... کورە، ئەجۆ دووبارە خەریکوو بساتەکەیەنی؟! زانی چێشا و ئی خەڵکە باسوو چێشیشا؟!
خاڵە: ناوەڵا لالۆ فەڵەدٚەگیان، خاس نمەیاوونە. ماشەڵا ئننە وری وری فرەن حیچما حاڵی نمەوۆ!!
قێخا فەڵەدٚە: ڕاسەکێش، ماوێوەن جۆرە گۆچانێو ئامێنێ بازاڕ، چنی گۆچانەکاو ئەوسای فەرقشا فرەن. چەمەرەکەشا ئەو چەموو دەعبایا مشۆ. ئەجۆ چەمێ هەورێشەیەنێ یان ماری و ماساوێ... خاڵ و مێڵشا ئەجۆ لاملێ ژەرەژانێ. عال بدٚیەیشا پۆنە ئاشکرای عالەم ئەجۆ خوای خوا!!!
خاڵە: ملۆوە پەشتەو دووربینەکەی. چەمێوەش قووجنۆ و ئەویچشا لکنۆ دووربینەکەیەرە. ماچۆ: دەی دەی... فرە باشەن! مزانی ئا گۆچانێ جە کۆگەوە ئاومێنە؟! دارەکەش چێشەن؟ کێ چەمنێینە؟! فرەتەر دلێ کام چینوو خەڵکیەنە برەوشا هەن؟ قیمەت مەکەرا؟
قێخا فەڵەدٚە: گردوو ئی باس و بالۆرەی جە گۆچانە زەردێوە دەسش پەنە کەرد. ژیولەن ژیولە!!
چی عانەنە کابرایێ هورمێزۆوە. مدٚۆ دلێ قسەکاو قێخا فەڵەدٚەیەرە.
ماچۆ: ئەرێ ئانە ژیولە ژیولەو چێشیتا قێخا؟ عەیب نیا کەریما نام و ناتۆرەو وەڵاتا. ئانە ئا زۆڵە، سەبا گردوو دنیێرە پەخشش کەرۆوە. خاسا مەگەر ژیولە پیاش کوشتەن؟! هونەرش هەن هونەر!!
قێخا فەڵەدٚە: ئەی تڕحێو پەی وێش و هونەریش؟! دا وس بە مچە بازن! تۆ پی مافەتێ ماچی هونەر؟ زانی چەنی دەگاکێش تێکە داینە؟! خۆ حەر ئینەتا مەنەن شنیەیدێ سەروپۆپڕوو یۆترینی؟!
مچە بازن: دەی چی چێش بیەن مەگە؟ کوڕێوی تازە هورئاما هونەرێوە تازەش ئاردەنەنە. جۆرە گۆچانێو چەمنۆ بابا و بابا گەورەو ئێمە بە خەیاڵشارە نامێنە. ئینە مافەتەن؟!
قێخا فەڵەدٚە: کوڕی تازە هورئاما یان شەیتانێوە ئاژاولەچی؟ تۆ پانەی ماچی هونەر؟
مچە بازن: دیاوە پەی دووربینەکەی! قێڕناش وەنەو خاڵەی: گێرۆ کورە ؟
خاڵە: ئەرێ وەڵا گردم گێرتەن...عال عالێ گێرۆش... »
«ڕەمای تا بەرەو دانشگای» ئەوتەر ئەرمان‌نامەکەو دلێو ئی کتیبیەنە هەکە بە پەشت‌بەستەی و وەرچەم نیای ئەرمان‌نامێوە «گلین هیوزی) ڕێک وزیان.
ئی کتیبە جە ژانروو ئەرمان‌نامەیەنە، دووهەم بەرهەموو نویسەریا. وەڵتەر ئەرمان‌نامەو «کۆمسای» پێسەو یەکەم دەقی ئەرمان‌نامەی جیددی جە زوانی هەورامیەنە وزیان وەروو دەسوو هۆگرا. گۆچانەیچ دووهەم کتیبا چی بوارەنە و خولقیاو ئی قەڵەمی.}

^{‍
نامێو بەرهەمی: ڕەمەزان
بابەت: شێعرێ
شاعێر: حاجی عەدنان سەمەدی
چاپوو ئەوەڵی: نەورۆزوو 1401
چاپ وپەخش: زایەڵە
ئی بەرهەمە بەشێوە چا شێعراو شاعێریشە گێرتێنێ وێ کە تایبەت به ڕەمەزانی و ڕۆچێ و ڕۆچەوانیەنێ.}

^{هەرپاسە کتێبوو"دڵی وەش"ی، جە نویستەو جەماڵ قادرپووری ڕەوانەو چاپی بی.
ئی کتیبە جە قاڵبوو غەزەڵێ هەورامیێ و جە لاو ئێنتێشاراتوو زایەڵەی چاپ و وەڵا مکریۆنەوە.}

^{زایەڵە: بە سانای و وانایۆ کتێبێوە، تاومێ پەی پارێزنای و گەشەکەردەی فەرهەنگەکەیما هەنگامەی گەورێ هورگێرمێ.}

١٩/٥/٢٠٢٢