بەڕێوەبەری دامەزراوەی ئاوی سنە دەڵێت، ساڵی رابردوو دوو هەزار و 460 سەرەمەنهۆڵ دزراون کە نرخیان سێ ملیار تمەن (زیاتر کە 100 هەزار دۆلاری ئەمریکی) بووە.
محەممەد فەرهاد، بەڕێوەبەری ئاوی پارێزگای سنە دەڵێت، بردنی سەرەمەنهۆڵەکان دەبێتە هۆی ئەوەی مەترسی جیدی لەسەر گیانی هاووڵاتییان دروستبێت، بۆ نموونە پێشتر ئۆتۆمبیلێک کە ژنێکی دووگیانی تێدا بووە کەوتووەتە نێو ئاوەڕۆی یەکێک لە شەقامەکانی سنە و منداڵەکەی لەبارچووە.
بەگوتەی محەممەد فەرهاد، سەرەمەنهۆڵەکان دەبردرێن و دواتر دەفرۆشرێنەوە و زیاتر کەسانی گیرۆدەبووی ماددە هۆشبەرەکان و سواڵکەرەکانیشن ئەو کارە دەکەن.
بەڕێوەبەری ئاوی پارێزگای سنە هەروەها باسی لەوەش کرد: "نرخی هەر سەرەمەنهۆڵێک پەیوەندیی بە گەورەیی و بچووکییەوە هەیە، بەڵام لانیکەم یەک ملیۆن تمەن دەکات".
چەند ساڵێکە بردنی سەرەمەنهۆڵ لە بەشێکی رۆژهەڵاتی کوردستان و ئێران زیادیکردووە، ئەوەش بەهۆی خراپتربوونی دۆخی ئابوورییەوە.
ئاماری ساڵەکانی 2020 و 2021 لەبەردەست نییە؛ بەڵام بە گوێرەی ئامارە فەرمییەکان، ساڵی 2019 لە هەموو ئێران 7 هەزار سەرەمەنهۆڵ دزراوە.
14/5/2022
