^{گوتەبێژی کۆشکی سپی دەڵێت "تاران هۆکاری وەستاندنی گفتوگۆکانە بۆ زیندووکردنەوەی ڕێککەوتنە ناوکییەکەی نێوان ئێران و زلهێزانی جیهان."}

^{جێن ساکی ڕۆژی سێشەممە لە وەڵامی پرسیاری پەیامنێرێکدا لە کۆشکی سپی گوتی "ئێران لە گفتوگۆکانی ڤیەننادا هەندێ داواکاری بێ بنەمای هەبووە کە هیچ پەیوەندییەکی بە ڕێککەوتنی ناوکییەوە نەبووە."}

^{گوتەبێژی کۆشکی سپی گوتیشی "ئەگەر ئێران مەرجەکانی ئەمەریکا و هاوپەیمانەکانمان قبوڵ بکات و ڕێککەوتنەکە لەگەڵ ئاسایشی نیشتمانی ئێمەدا بگونجێت، ئەوا ئێمە دەگەڕێینەوە بۆ ناو ڕێککەوتنەکە."}

^{گوتەبێژی کۆشکی سپی ئامادەیی ئەمەریکا و هاوپەیمانەکانی ڕاگەیاند بۆ ڕێککەوتنێکی بەهێز ئەگەر ئێران ئامادە بێت، بەڵام هاوکات داوای لە کۆماری ئیسلامی کرد لە جیاتی هەوڵدانی بۆ وەرگرتنی خاڵی سیاسی و تاوانبارکردنی لایەنەکان، سەرنجی خۆی بخاتە سەر بە ئەنجام گەیشتنی گفتوگۆکانی ڤیەننا.}

^{لێدوانەکەی گۆتەبێژی کۆشکی سپی لە کاتێکدایە کە وەزیری دەرەوەی کۆماری ئیسلامی ئێران ڕۆژی دووشەممە لە تۆڕی کۆمەڵایەتی تویتەردا ڕایگەیاندبوو "ئەگەر کۆشکی سپی ڕاستییەکان لەبەرچاو بگرێت و بە دروستی هەڵسوکەوت بکات، ئەوا ڕێککەوتنەکە دەتوانێت بگاتە ئەنجام."}

^{هەروەها لە تویتەکەیدا ئاماژەشی بەوە کرد کە "ئەگەر لە پڕۆسەی دانوستانەکانی ڤیەننادا وەستانێک هەبێت ئەوە بەهۆی کەمتەرخەمی ئەمەریکاوەیە و وەزارەتی دەرەوەی ئێران لە پێناو پاراستنی بەرژەوەندییە مەزنەکانیدا و بە لەبەرچاوگرتنی هێڵە سوورەکانی، بەهێز و لۆژیکەوە هەنگاو دەنێت، هەرگیز زۆرخوازیی ئەمەریکا قبووڵ ناکات ئەگەر کۆشکی سپی بە دروستی مامەڵە بکات ئەوا رێککەوتنەکە دەگاتە ئەنجام."}

^{بەگوتەی ئەمیر عەبدوڵاهیان ئەگەر لە پڕۆسەی دانوستانەکانی ڤیەننادا وەستانێک هەبێت ئەوا هۆکارەکەی دەگەڕێتەوە بۆ کەمتەرخەمی لایەنی ئەمەریکایی و وەزارەتی دەرەوەش بە شێوەیەکی بەهێز و بە پاراستنی هێڵە سوورەکان لە پێناو بەرژەوەندییە نیشتمانییەکاندا هەنگاو دەنێت.}

^{جێی ئاماژەیە کە گفتوگۆکان لە ڤیەننا بۆ زیندووکردنەوەی ڕێککەوتنە ناوکییەکەی ساڵی 2015 بەهۆی پێداگری کۆماری ئیسلامی ئێران بۆ لابردنی سوپای پاسداران لە ڕیزبەندی تیرۆری ئەمەریکا ڕاگیراوە.}

5/4/2022