^{پێشتر خه‌ڵكی كوردیی ناوچه‌كه‌ ئاواره‌ بوون و ئێستا په‌نابه‌رانی سووریا و بنەمالەی گرووپە تووندئاژۆکان له‌ جێگه‌یان نیشته‌جێ ده‌كرێن
سه‌رۆكی فه‌رمانگه‌ی كۆچ له‌ وه‌زاره‌تی ناوخۆی توركیا، سواش ئۆنلۆ، گوتی: نیو ملیۆن په‌نابه‌ری سووریا گه‌ڕێندراونه‌ته‌وه‌ بۆ وڵاته‌كه‌یان و له‌و ناوچه‌ ئارامانه‌ی باكووری سووریا کە مەبەستی رۆژئاوای کوردستانە نیشته‌جێ كراون، كه‌ توركیا به‌ توانای خۆی درووستی كردوون.}

^{گوتیشی: توركیا 3.7 ملیۆن په‌نابه‌ری سووریا و 300هه‌زار په‌نابه‌ری وڵاتانی دیكه‌ی له‌ خۆ گرتووه‌.}

^{هه‌روه‌ها گوتی: چاره‌سه‌ری كێشه‌ی په‌نابه‌ران، پێویستی به‌ دۆزینه‌وه‌ی چاره‌سه‌ری هۆكار و سه‌رچاوه‌ی كێشه‌كانه‌.}

^{توركیا له‌و ناوچانه‌ی رۆژئاوای کوردستان کە كه‌وتوونه‌ته‌ سنووری ئۆپراسیۆنه‌ داگیرکاریەکانی، به‌ تایبه‌تی ناوچه‌كانی سنووری عه‌فرین، كه‌مه‌ره‌یه‌كی ئه‌منی بۆ بنەمالەی عەرەب سووریەکان و بنەماڵەکانی گرووپە رادیکالە ئیسلامیەکان درووست كردووه‌.}

^{پێشتر توركیا رایگه‌یاندبوو، ئامانجی له‌ داگیركردنی ناوچه‌كانی رۆژئاوای کوردستان واتە لە باكووری سووریا درووستكردنی په‌ناگه‌یه‌كه‌ بۆ په‌نابه‌رانی سووریا.}

^{نیشته‌جێكردنی نیو ملیۆن په‌نابه‌ری سووریا له‌و ناوچانه‌ی كه‌وتوونه‌ته‌ ژێر ده‌سه‌ڵاتی سوپای توركیا به‌ مه‌ترسی بۆ سه‌ر ره‌وشی دیموگرافی ناوچه‌كه‌ لێكده‌درێته‌وه‌، به‌و پێیه‌ی دانیشتوانی ره‌سه‌نی ناوچه‌كه‌ كوردن و به‌شێكیان به‌ هۆی ئۆپراسیۆنه‌ داگیرکارییەکان ئاواره‌ بوون.}

٢٧/٣/٢٠٢٢