لێژنەی باڵای ئەمنیی پارێزگای ئیلام داواکاری چالاکڤانانی مەدەنی شارەکەی بۆ بەڕێوەبردنی رێوڕەسمی نەورۆز رەتدەکاتەوە.
بەپێی زانیارییە هەواڵییەکان، ژمارەیەک چالاکڤانی مەدەنی شاری ئیلام چەند رۆژ بوو داواکارییان پێشکەشکردبوو بۆ بەڕێوەبردنی رێوڕەسمی نەورۆز لەو شارە، بەڵام رۆژی پێنجشەممە لە کۆبوونەوەی لێژنەی باڵای ئەمنیی پارێزگای ئیلام، کە لە باڵەخانەی پارێزگاری ئیلام بەڕێوەچوو، داواکارییەکە رەتکراوەتەوە.
ئەو چالاکڤانانە پێشتر رەزامەندی بەڕێوەبەرایەتی کولتوور، قایمقامیەت و دەزگاکانی دیکەی حکومەتیان وەرگرتبوو بۆ بەڕێوەبردنی رێوڕەسمەکە، بەڵام بەشی هەواڵگریی سوپای پاسداران کە بە ئیتلاعاتی سوپا ناسراوە، دژی بەڕێوەبردنی رێوڕەسمەکە بووە و رێگەی نەداوە بەڕێوەبچێت. ساڵانی پێشتر رێگە دەدرا لە شاری ئیلام رێوڕەسمی تایبەت بە نەورۆز بەڕێوەبچێت.
ئەمساڵ دامودەزگا حکومییەکان و دامەزراوە ئەمنییەکانی ئێران لە رۆژهەڵاتی کوردستان رایانگەیاندووە، رێگە نادەن رێوڕەسمەکانی نەورۆز بەشێوەی خۆڕسک بەڕێوەبچن و هەر کەس بیەوێت رێوڕەسمەکە بەڕێوەببات دەبێت سەرەتا داواکاری پێشکەشی قایمقامیەت و بەڕێوەبەری ناحیەکان بکات.
کۆمەڵێک مەرج دانراون بۆ بەڕێوەبردنی رێوڕەسمەکان وەکو رێگەنەدان بە هەڵکردنی ئاڵای کوردستان و سرودی نیشتمانی و خوێندنەوەی گوتار و شیعر لەلایەن کەسانێکەوە، کە رێگەپێدراو نین. هەروەها بەڕێوەبەرانی رێوڕەسمەکان ناچار دەکرێن ئاڵای ئێران دابنێن.
سەرچاوە رووداو
١٨/٣/٢٠٢٢
