هەرچەندە ماوەی دوو هەفتەیە شاندە دانوستاندکارەکان بۆ گفتوگۆکردن لەسەر چالاککردنەوەی رێککەوتنی ئەتۆمیی ئێران گەڕاونەتەوە ڤیەننا، بەڵام کۆشکی سپی بێزاریی خۆی لە بەرامبەر پڕۆگرامە ئەتۆمییەکەی تاران دەردەبڕێت و لۆمەی ئاڵۆزبوونی رێککەوتنەکە دەخاتە ئەستۆی دۆناڵد ترەمپ و دەڵێت: "ئەگەر ترەمپ لاسارانە لە رێککەوتنەکە نەکشابایەوە، هیچ لەو شتانە روویاننەدەدا، کە ئێستا دەیانبینین".
جین ساكی، گوتەبێژی کۆشکی سپی دەڵێت، کشاندنەوەی ئەمریکا لە رێککەوتنی ئەتۆمیی ئێران لە لایەن دۆناڵد ترەمپ، سەرۆکی پێشووەوە، وایکرد ئێران پڕۆگرامە ئەتۆمییەکەی بەرەو پێشببات و هێرشبکاتە سەر هاوپەیمانەکانی واشنتن لە کەنداو.
دەشڵێت هەر بەهۆی ئەو هەنگاوەی ترەمپەوە بوو کە "هێزە بەوەکالەتەکانی ئێران دووبارە دەستیان بە هێرشکردنە سەر هێزەکانی ئەمریکا کرد لە عێراق."
شاندەکانی ئەو وڵاتانەی کە هێشتا لە رێککەوتنەکەدا ماون، واتە بەریتانیا، فەرەنسا، ئەڵمانیا، رووسیا و چین، سەرقاڵی گەڕی هەشتەمی گفتوگۆکانن لەگەڵ تاران، بۆ ئەوەی رێککەوتنەکە چالاک بکەنەوە، کە ئامانج لێی سنوورداکردنی پڕۆگرامی ئەتۆمیی ئێرانە.
شاندێکی ئەمریکیش بۆ ئەو مەبەستە لە ڤیەننایە، بەڵام بەشێوەیەکی ناڕاستەوخۆ لەگەڵ ئێرانییەکان گفتوگۆ دەکەن.
رێککەوتنەکە ساڵی 2018 هەرەسی هێنا کاتێک دۆناڵد ترەمپ، سەرۆکی ئەوکاتی ئەمریکا لە رێککەوتنەکە کشایەوە و دووبارە سزای بەسەر تاراندا سەپاندەوە.
ئێستا گفتوگۆکان گەیشتوونەتە قۆناخێکی چارەنووسساز و هەندێک لە دیپلۆماتەکان دەڵێن بەرەوپێشچوونێکی کەم دروستبووە، بەڵام هۆشداریش دەدەن کە کات بۆ زیندووکردنەوەی رێککەوتنەکە بەرەو تەواوبوون دەچێت.
لە کۆنفڕانسێکی رۆژنامەڤانیدا، رۆژی چوارشەممە، جێن ساکی، گوتەبێژی کۆشکی سپی جارێکی دیکە لۆمەی ترەمپی کرد. جین ساکی دەڵێت ئیدارەی بایدن هێشتا لە زیندووکردنەوەی رێککەوتنەکە بێهیوا نەبووە و "پەرۆشی دۆزینەوەی رێگەیەکی دیپلۆماسییە بۆ هەنگاونان بەرەو پێشوە."
14/1/2021
