لە شەوی رابردووەوە شەپۆلێکی بەفر بارین باکووری کوردستانی گرتووەتەوە. بەفر ناوەندی شارەکانی ئەرزەڕۆم، ئەرزینگان، دێرسم، ئەردەخان، ئاگری، قەرس و چەولیگی سپیپۆش کردووە.
لە سنووری پارێزگاکانی وان، بەدلیس، موش، سەمسوور، ئەرزەڕۆم، ئەرزینگان، خارپێت، چەولیگ، سێرت و دێرسم رێگەی 900 گوند و ئاوایی داخراون. لە تەواوی چەولیگ و چەند شارۆچکەیەکی دێرسم و بەدلیس پشووی خوێندن راگەیێندراوە.
گەورەشارەوانیی وان ئەمڕۆ دووشەممە 10ی کانوونی دووەمی 2022 رایگەیاند، بەهۆی بارینی بەفرەوە لە شەوی رابردووەوە رێگەی 158 گوند داخراون و تیمەکانی شارەوانی لە هەوڵی بەردەوامدان بۆ راماڵینی بەفر و کردنەوەی رێگەی ئەو گوندانە.
لە سنووری پارێزگای موش، بەفر رێگەی 261 گوندی داخستووە و تیمەکانی شارەوانی لە بەرەبەیانی ئەمڕۆوە دەستیان بە راماڵینی بەفر کردووە بۆ کردنەوەی رێگەی گوندەکان.
لە سنووری پارێزگای بەدلیسیش بەهۆی بارینی بەفرەوە رێگەی 203 گوند بەڕووی هاتووچۆدا داخراون.
لە ناوەندی شارۆچکەی خەڵات سەر بە شارۆچکەی بەدلیس، بارینی بەفر بەردەوامە و 20 بۆ 50 سانتیمەتر بەفر لە ناوەندی ئەو شارۆچکەیە باریوە.
شەوی رابردوو لە ناوەندی شاری جۆلەمێرگیش بەفر باری. لە سنووری شارۆچکەی گەڤەری جۆلەمێرگ لە هەندێک ناوچەدا زیاتر لە شەش مەتر باریوە و بۆ رێگریکردن لە داخستنی رێگەکانیش تیمەکانی شارەوانی بەردەوامبوون لە راماڵینی بەفر.
بەهۆی بارینی بەفر ئەمڕۆ لە تەواوی پارێزگای چەولیگ، سێ شارۆچکەی دێرسم، ناوەندی شاری بەدلیس و سێ شارۆچکەی ئەو پارێزگایە بۆ ماوەی یەک رۆژ پشووی خوێندن راگەیێندرا.
سەرچاوە: رووداو
10/1/2021
