^{بەڕێوەبەرایەتی ئاسایشی پارێزگای سلێمانی وردەكاری دەستگیركردنی گروپێكی سەر بە چەكدارانی داعشی لە پارێزگای هەڵەبجە بڵاوكردەوە.
بەپێی راگەیەنراوێكی بەڕێوەبەرایەتی ئاسایشی پارێزگای سلێمانی ئاماژە بەوەكراوە، لەئەنجامی چاودێری و كۆكردنەوەی زانیاری ورد لەسەر گروپێكی سەر بەڕێكخراوی تیرۆریستی داعش لەپارێزگای هەڵەبجە، پاش دەستخستنی بەڵگەی تەواو لەسەریان كە مەرامیان بوو لە سنوری پارێزگای سلێمانی و هەڵەبجە و ئیدارەی گەرمیان كردەوەی تیرۆریستی ئەنجام بدەن و ئاسایشی هەرێم تێكبدەن، هەروەها پاش وەرگرتنی بڕیاری دادوەری لێكۆڵینەوەی ئاسایشی پارێزگای سلێمانی و لەژێر چاودێری و رێنمایی سەرۆكی دەزگای ئاسایشی هەرێم، بەڕێوبەرایەتی ئاسایشی پارێزگای سلێمانی/ هێزەكانی ئۆپەراسیۆنی ئاسایشی سلێمانی، بەهاوكاری هێزەكانی بەڕێوبەرایەتی ئاسایشی شارەزوور، لەهەڵمەتێكی بەرفراوان و چەند ئۆپەراسیۆنێكی جیاجیای سەركەوتودا رۆژی چوارشەممە 8-12 ژمارەیەك لە ئەندامانی تاقم و گروپی نەنستوی تیرۆریستانی داعش لەشاری هەڵەبجە، قەزای سەیدسادق و شارۆچكەكانی خورماڵ و سیروان و چەند گوندێكی شارەزوور دەستگیركران و دەست بەسەر ژمارەیەك لە چەك و تەقەمەنیشدا گیرا كە پیلانیان دانابو تا لە كردەوە تیرۆریستییەكانیاندا بەكاری بهێنن.
ئاسایشی سلێمانی راشیگەیاندوە، لێرەوە بۆ كۆمەڵانی خەڵكی كوردستانی روندەكەینەوە لەبەر سەلامەتی لێكۆڵینەوەكان و پاراستنی دۆسیەكە زانیارییەكانی پەیوەست بەم پیلانەی تیرۆریستان دەهێڵینەوە و لە داهاتوویەكی نزیكدا بە بەڵگەو دۆكیۆمێنتی دروست زانیاری زیاتر لەبارەی شكستپێهێنانی تێكدانی ئارامی هەرێم لەلایەن تیرۆریستانەوە بۆ رای گشتی بڵاودەكەینەوە .}

سەرچاوە: رادیۆ نەوا

9/12/2021