^{شەوی هەینی ١٢ی سەرماوەز، ژنێک بە ناوی "سەحەر مورادی" تەمەن ٣٣ ساڵ، بە لێدانی چەقۆ لەلایەن براکانییەوە لە گوندی "باوەرێز" سەر بە سنە کوژرا.}

^{سەرچاوەیەکی ئاگادار لەم پەیوەندییەدا بە کوردپای ڕاگەیاند: "ئەو هاووڵاتییە بەهۆی پەیوەندی لەگەڵ کەسێکی دیکە، لەلایەن براکانیەوە بە چەقۆ کوژرا".}

^{ئەو سەرچاوە ئاگادارە هەروەها وتی: "سەحەر مورادی خاوەن دوو منداڵە و هاوسەرەکەی دوو ساڵ لەمەوبەر گیانی لەدەست داوە".}

^{ئەو سەرچاوە ئاگادارە هەروەها ئەوەشی خستە ڕوو کە ڕۆژی شەممە ١٣ی سەرماوەز، تەرمی ئەو هاووڵاتییە بەبێ بەڕێوەبردنی ڕێوڕەسمی پرسە و سەرەخۆشی ئەسپەردەی خاک کرا.}

^{ئەو سەرچاوەیە زیادی کردووە کە هەتا ئێستا هیچ کام لە بکوژانی ئەو ژنە لەلایەن ناوەندە پەیوەندیدارەکانەوە دەسبەسەر نەکراون.}

^{بە پشتبەستن بە ئاماری تۆمارکراو لە ناوەندی ئاماری ڕێکخراوی مافی مرۆیی کوردپا، لە ٢٥ی نوامبری ٢٠٢٠ هەتا ٢٥ی نوامبری ٢٠٢١ـەوە، سەرجەم ٣٨ حاڵەتی کوشتنی ژنان لە کوردستانی ڕۆژهەڵات ڕوویان داوە.}

^{ڕۆژی هەینی ١٢ی سەرماوەز هاووڵاتییەک بە ناوی "کوبار سەحەت" کچی "خەلیل" و دانیشتووی گوندی "گردوان" سەر بە ناوچەی مەرگەوەڕی ورمێ، ئاگری لە جەستەی خۆی بەردا و کۆتایی بە ژیانی خۆی هێنا.}

^{بە وتەی سەرچاوەیەکی ئاگادار، ئەو هاووڵاتییە بەهۆی کێشەی بنەماڵەییەوە خۆی سووتاندووە.}

^{کوبار سەحەت، خێزاندار و خاوەن سێ منداڵە.}

^{هەر لەو پەیوەندییەدا ڕۆژی پێنجشەممە ٤ی سەرماوەز، کچێکی لاو بە ناوی "ژاڵە سەحراپەیما" کچی "سەعدوڵڵا"، تەمەن ٢٠ ساڵ و خەڵکی "زێوە" سەر بە ناوچەی "مەرگەوەڕ"ی ورمێ، ئاگری لە جەستەی خۆی بەردا و بەهۆی ڕێژەی زۆری سووتاوییەکەوە لە نەخۆشخانەیەکی ورمێ گیانی لەدەست دا.}

سەرچاوە: کوردپا

٥/١٢/٢٠٢١